Путин қисқа муддатли мақсадларга ўтдими? Ғарб разведкаси таҳлил берди

2 май, жума куни Американинг CNN телеканали Ғарб разведка хизматларига таяниб, Россия президенти Владимир Путиннинг Украинага қарши урушдаги стратегик йўналиши ҳақида янги маълумотларни эълон қилди.

Баёнотга кўра, Путин ҳозирда узоқ муддатли ғалабалар эмас, балки қисқа муддатдаги тактик ютуқлар ва иктисодий босимни енгиллаштиришни мақсад қилмоқда.

Ҳудудий назорат ва ҳарбий саноатни ривожлантириш устувор йўналишга айланди

Разведка ҳисоботларига кўра, Кремль диққатини босиб олинган Украина ҳудудлари устидан тўлиқ назорат ўрнатиш ва уларни сиёсий-иқтисодий жиҳатдан Россия тизимига интеграция қилишга қаратмоқда.

Бу билан бирга, Россиянинг ҳарбий саноатига катта миқдордаги маблағлар йўналтирилмоқда. Бу, бир томондан, фронтдаги эҳтиёжларни таъминлаш, иккинчи томондан эса, санкциялар туфайли мураккаб аҳволга тушган ички иқтисодиётни рағбатлантириш воситаси сифатида қаралмоқда.

“Бу Путин учун уруш фойдага ишлаяпти, деган ишончни кучайтиради”

CNN телеканали ёзган таҳлилда қайд этилишича, Путин Ғарб санкцияларига қарамасдан, ўзини ҳозирча барқарор деб ҳис қилмоқда ва уруш ҳолати унинг фойдасига ишлаётганига ишонаётган бўлиши мумкин.

“Путин ҳозир заифлашган Украинага қарши узоқроқ муддатли фронтда ҳаракат қилиш имкони бор, деб ҳисоблаяпти. У бутун мамлакатни тўлиқ назорат қилиш учун етарли куч ва захираларга эга, деган ишончда”, — дейилади CNN манбаси сўзларида.

Трамп омили: Кремлда тинчлик имконияти кўрилмоқда

Телеканалнинг икки алоҳида манбаси маълум қилишича, Путиннинг стратегик ёндашувидаги сўнгги ўзгаришларга АҚШдаги сиёсий жараёнлар ҳам таъсир қилган. Хусусан, у президент Доналд Трамп ва унинг атрофидаги жамоа Украина билан тинчлик келишуви юзасидан музокараларга очиқ бўлиши мумкин, деб ҳисоблайди.

Бу эса Кремль учун стратегик имконият сифатида қаралмоқда. Трамп ҳокимиятга келганидан сўнг Россия ўз шартларини илгари сура оладиган вазият вужудга келиши мумкин, деган умидлар шаклланмоқда.

Ҳозирги вазиятда Путиннинг урушга бўлган ёндашувидаги эҳтимолий ўзгаришлар халқаро сиёсатда янги босқични бошлаши мумкин. Сизнингча, Россия иқтисодий босим остида ҳақиқатан ҳам “қисқа йўл”ни танлаяптими ёки бу фақат тактик алдамчиликми? «Замин»ни Telegram’да ўқинг!