Oʻzbekistonda hazil va vaynerlik orqali tanilgan, “Oʻzbek Jim Kerrisi” deya taʼriflanadigan Moʻmin Ibrohimov 27 aprel kuni 34 yoshni qarshi oldi. “Million” kulgi jamoasi aʼzosi va “Mo‘min live” loyihasi rahbari sifatida tanilgan aktyor bugungi mashhurlikka qanday yetib kelgani koʻpchilikka qiziq.
Bolalikdan sahnaga mehr
Uning aytishicha, haqiqiy ismi Abdurasul boʻlib, buni ilk bor maktabga borganida bilgan. Oila aʼzolari uni kichikligidan “Moʻmin” deb chaqirgan. Fargʻonada tugʻilib, keyinchalik Andijon va Namanganda yashagan, 2005 yilda esa Toshkentga koʻchib kelgan.
Bolaligidanoq atrofidagilarni kuldirishga qiziqqan Moʻmin qoʻshni bolalarni yigʻib, “tomoshalar” qoʻyib berganini eslaydi. Keyinchalik bu qiziqish uni katta sahnaga yetakladi.
QVZ va ilk muvaffaqiyatlar
Yoshlikda u ruscha KVN dasturlarini koʻp tomosha qilgan va aynan shu orqali sahnaga qiziqishi oshgan. Ilk chiqishlaridanoq gʻoliblikni qoʻlga kiritgani uning ishonchini mustahkamlagan. Keyin “Shovvozlar” jamoasida ham qatnashib, chempionlikka erishgan.
Shunga qaramay, u avval tadbirkor boʻlishni orzu qilgan va hatto Angliyaga ketishni rejalashtirgan. Biroq bu rejalar amalga oshmagan va u komediya sohasiga butunlay kirib ketgan.
Qarz girdobi va qiyin sinovlar
Moʻmin Ibrohimov hayotidagi eng ogʻir davrlardan biri katta qarzlarga botgan paytlari boʻlgan. Uning aytishicha, qarzi 47 ming dollargacha yetgan va hatto oilasiga tegishli mol-mulklarni sotishga majbur boʻlgan. Bu holat unga katta saboq boʻlib, moliyaviy xatolardan uzoqlashishga undagan.
“Zerikdim va uylandim”
Komik hayotidagi eng qiziq qarorlardan biri — uylanishi. Uning taʼkidlashicha, yoʻl-transport hodisasidan keyin kasalxonada yotgan vaqtda hayotida oʻzgarish qilishni istagan va shu qarorga kelgan.
Qiz bilan birinchi uchrashuvni belgilab, hatto unutgani ham kulgili voqealardan biri sifatida esda qolgan. Shunga qaramay, aynan birinchi uchrashgan qizi bilan oila qurgan. Bugungi kunda ular ikki nafar farzandni tarbiyalab kelmoqda.
Ism sababli AQSH vizasi rad etilgan
Qiziq holatlardan yana biri — uning AQSH vizasi ololmagani bilan bogʻliq. Pasportdagi ismi Abdurasul boʻlgani, internetda esa “Moʻmin” sifatida tanilgani sabab elchixonada tushunmovchilik yuzaga kelgan.
Uning aytishicha, hatto internetda ismini qidirganda boshqa shaxslarga oid videolar chiqqan va bu holat qarorga taʼsir qilgan boʻlishi mumkin.
Millionlik reklama va mashhurlik
Bugungi kunda Moʻmin Ibrohimov ijtimoiy tarmoqlardagi faoliyati orqali katta auditoriyaga ega. U videolari uchun mablagʻni ayamaydi va reklama narxlari ham bozordagi eng qimmatlaridan biri hisoblanadi.
Muxlislar esa uning samimiyligi, hayotiy hazillari va oddiy uslubini qadrlaydi. Shu jihatlar uni nafaqat komik, balki zamonaviy internet yulduziga aylantirgan.
Read “Zamin” on Telegram!
