2 сентябрь куни Ўзбекистон президенти Шавкат Мирзиёев Хитойга расмий ташриф доирасида ушбу мамлакатнинг нуфузли компаниялари раҳбарлари билан учрашув ўтказди. Самимий мулоқот ишбилармонлик дастурининг асосий нуқтаси бўлди.
Учрашувда China Gold, China Coal Resources, China Datang Corporation, Tianjin Rail Transit Group, Poly Changda, Tianjin Urban Construction, Jinchuan Group, China Synfuels, ST Wonderful, Mizuda, World Agriculture, Dongzhu Ecology ва яна қатор йирик корпорациялар раҳбарлари иштирок этди.
Президент Шавкат Мирзиёев Хитой бизнесининг Ўзбекистон бозорига бўлган қизиқиши йилдан-йилга ортиб бораётганини таъкидлади. Унинг сўзларига кўра, ўтган йилнинг ўзида мамлакатимизга кириб келган инвестициялар ҳажми 10 миллиард доллардан ошиб кетган. Бу эса икки давлат ўртасидаги иқтисодий шерикликнинг қанчалик юқори суръатларда ривожланаётганидан далолатдир.
Учрашувда икки томонлама ҳамкорликнинг янги истиқболлари муҳокама этилди. Хусусан, энергетика ва геология соҳалари, қишлоқ ва сув хўжалиги, кимё саноати, заргарлик ишлаб чиқариши каби йўналишларда қўшма лойиҳалар амалга ошириш масалалари кўриб чиқилди. Шунингдек, шаҳар жамоат транспортини модернизация қилиш, инфратузилмани янгилаш ва туризм тармоғини ривожлантириш бўйича йирик қадамлар белгиланди.
Шу тариқа, Тянцзинда бўлиб ўтган учрашув Ўзбекистон ва Хитой бизнес ҳамкорлигини янада юқори босқичга олиб чиқиши кутиляпти.
«Замин»ни Telegram’да ўқинг!
