Хаби Алонсо: Винисиус билан ўзаро ишонч — жамоанинг кучи

«Реал Мадрид» бош мураббийи Хаби Алонсо жамоанинг етакчи футболчиларидан бири — Винисиус Жуниор билан муносабатларига оид фикрлари билан ўртоқлашди. Унинг таъкидлашича, бразилиялик ҳужумчи билан орасидаги ўзаро ишонч ва очиқ мулоқот жамоа ўйинида муҳим омиллардан бири ҳисобланади.

«Винисиус билан муносабатларимиз жуда пухта. У жамоа ўйинида ҳал қилувчи ўрин тутади. Орамизда ўзаро ишонч мавжуд. Ҳар бир беллашувдан олдин у менинг фикрларимни билиб олади, мен эса унинг нима ўйлаётганини. Қарорларни биргаликда қабул қилишнинг энг тўғри йўли шу», — деди Алонсо TNT Sports Brasil билан суҳбатда.

Ўтган турда «Реал» Чемпионлар Лигаси умумий босқичининг 5-турида «Олимпиакос»ни 4:3 ҳисобида мағлуб этди. Беллашувда Мбаппенинг покери барча муҳокаманинг марказида бўлди, аммо Винисиус Жуниор ҳам ўз ҳиссасини қўшмай қолмади — у француз юлдузининг икки голига аниқ пас билан ёрдам берди.

Беллашувдан сўнг майдондаги илиқ манзара мухлисларни янада хурсанд қилди — Алонсо ва Винисиус бир-бирини самимий табриклаб, беш ташлаб, қучоқлашиб қўйишди. Бу ҳолат жамоадаги атмосфера қай даражада кучли эканини яна бир бор намоён этди.

Мадридликлар ҳозирги пайтда юқори руҳиятда бўлиб, мураббий ва етакчилар ўртасидаги бундай ишончли алоқалар «қаймоқранглилар»нинг кейинги босқичлардаги ҳаракатига катта таъсир кўрсатиши шубҳасиз.