Ўзбекистон миллий терма жамоасининг собиқ бош мураббийи Темур Кападзе Индонезияга амалий сафар давомида “Гаруда ТВ”га катта интервью берди ва унда Каннаваронинг терма жамоага келиши борасидаги фикрларини атрофлича баён этди. Унинг сўзларига кўра, бу қарор футбол жамоатчилиги орасида катта муҳокамалар ва турли муносабатларга сабаб бўлган.
Кападзе аввало Ўзбекистоннинг Жаҳон чемпионатига чиққан аввалги саралаш босқичларини эслаб ўтди. Унинг таъкидлашича, мухлислар ўз мураббийи жамоани мундиалга олиб боришини истаган, бу фикр жамоатчиликда кенг тарғиб қилинган ва кўплаб саволлар туғдирган.
“Албатта, мундиалга йўл олиш насиб қилмади. Лекин кўплаб ишқибозлар: нега ўз мураббийимиз жамоани олиб бормайди, деб эътироз билдирди. Уларнинг бу фикрини тушунаман — ахир бу тарихимизда илк бор Жаҳон чемпионатида қатнашиш имкони эди. Бунгача бизнинг олдимизга катта натижалар талаби қўйилмаган бўлса-да, мухлислар буни жуда ҳиссиёт билан қабул қилди”, — дейди мутахассис.
Кападзе интервью давомида ўзига билдирилган ишончни ҳам эслаб, раҳбарият қарорини ҳурмат қилишини таъкидлади:
“Мен жамоани бошқарганимда муаммо бўлмасди, деб ўйлайман. Бу мен учун жуда муҳим тажриба бўлар эди. Бироқ раҳбарият бошқача йўлни маъқул топди. Сабаби — биз илк бор мундиалга чиқаётгандик ва у ерда бизни қандай синовлар кутишини билмасдик. Шу боис тажрибали, Жаҳон чемпионатида қатнашган мутахассисга ишониш мақсадга мувофиқ, деб топилди”.
Шунингдек у интервью давомида нега маълум вақт давомида Фабио Каннаваронинг ёрдамчиси сифатида фаолият юритганини ҳам тушунтирди:
"Фабио Каннаваро келганидан сўнг мен раҳбарият билан гаплашдим. Терма жамоага тезроқ мослашиши учун Каннаварога иккита йиғинда ёрдам бераман. Мен эса алоҳида фаолият юритишни афзал кўрдим. Ўз устимда кўпроқ ишлаганим маъқул, деб уларга айтдим. Раҳбарият буни тўғри қабул қилиб, рози бўлди", — деди Кападзе.
Унинг фикрича, Каннаваронинг келиши — жамоа учун янги босқич ва янги ёндашувларни амалга олиш имконияти. Бироқ Кападзе ўзига нисбатан билдирилган ишонч ва меҳр учун мухлисларга миннатдорлигини ҳам унутмади.
Қисқа қилиб айтганда, собиқ мураббий бу қарорни шахсий ранжишсиз, балки профессионал ёндашув билан қабул қилгани ва терма жамоа учун доим яхши натижа тилашини яна бир бор таъкидлади.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
