Сенегалда футбол байрами бутун мамлакат миқёсида давом этади. Африка Миллатлар Кубоги финалида Марокаш устидан қозонилган драматик ғалабадан (1:0) сўнг Сенегал президенти 19 январни иш ҳақи сақланган ҳолда умуммиллий дам олиш куни деб эълон қилди.
Мамлакат раҳбари Бассиру Диомай Фай сенегал халқига мурожаат қилиб, тарихий натижа муносабати билан 19 январни ҳақ тўланадиган дам олиш куни ва давлат байрами сифатида белгилашини маълум қилди. Унинг таъкидича, бу қарор халқнинг қувончи, жамоанинг меҳнати ва миллий ғурурни кенг нишонлаш учун қабул қилинган.
Шу тариқа, бугун Сенегалда миллионлаб фуқаролар ишга чиқмайди. Қишлоқлардан тортиб йирик шаҳарларгача — барча ҳудудларда байрам кайфияти ҳукм суриши, кўчаларда қўшиқлар, байроқлар ва жамоавий тантаналар билан терма жамоанинг Африка Кубогидаги иккинчи чемпионлиги нишонланиши кутилмоқда.
Футбол баъзан бир ўйин билан мамлакат кайфиятини ўзгартириб юборади. Сенегал учун бу финал шунчаки кубок эмас — бу миллат бирлашган, ишонган ва охирида ўз қувончини бутун дунёга кўрсатган кун бўлди. Энди эса ғалабанинг завқи — майдондагина эмас, бутун мамлакатда давом этади.
“Zamin”ни Telegram'да ўқинг!
