Валенсия майдони — «Месталья»да «Реал» 0:2 ҳисобида ғалаба қозонган бўлса-да, ўйин Мадрид клуби учун жуда оғир кечди. Ҳаттоки голлар муаллифлари ҳам майдонда тўлиқ ишонтира олмади: Мбаппени рақиблар узоқ вақт «боғиб» қўйди, Альваро Каррераснинг ғалаба калитига айланган ўша ёрқин рейди эса ҳар куни такрорланадиган эпизод эмас. Бу ҳақда euro-football.ru хабар беради.
Альваро Арбелоа жамоаси умумий манзарада суст, оғир ва секин ҳаракат қилди. Шу боис учрашувда «Реал» сафида айрим футболчилар амалда «Валенсия»га кўпроқ қулайлик яратиб берди, деган таассурот қолдирди.
Қуйида «Валенсия» – «Реал» баҳсида энг омадсиз кўринган тўрт мадридлик ҳақида: субъектив баҳолар 10 баллик тизим асосида берилди.
Дин Хё'йсен — 4,0. Антирейтингни кутилмаганда ассист муаллифи очади. Каррераснинг голи олдидан тўп айнан Хё'йсен орқали Альварога етиб борган бўлса-да, бу эпизоддаги асосий меҳнат Каррерасники эди. Дин эса кўпроқ ҳимоядаги хатолари билан эсда қолди: Белтранни йўқотиб қўйди ва у ҳисобни тенглаштириши керак эди (устун қутқарди), шунингдек, яккакурашларнинг ярмидан кўпида ютқазди — 12 та дуэлнинг 6 тасида.
Эдуардо Камавинга — 3,5. Француз ярим ҳимоячиси курашларда жуда қўпол ва ноаниқ ўйнади: вақтни ҳис қилишда кўп адашди, кечикди, фол ишлади. 13 та яккакурашдан 7 тасида мағлуб бўлди, уч марта қоида бузди ва 6 бор тўп йўқотди. Ҳаракат кўп, аммо ҳужумда кескинлик ҳам, ҳимояда хотиржамлик ҳам бермади.
Давид Хименес — 3,0. Ёш ҳимоячидан жамоани етаклаш талаб қилинмайди, аммо унинг олдинга қўшилишлари ҳаддан ташқари эҳтиёткор ва олдиндан ўқиладиган бўлди. Мбаппе унга вазият ҳам яратди, бироқ Давид дарвозабонга тепди. Уч бор узатма ёки навбатдаги ошириш имконияти ҳам самара бермади. Ижобий томони — камида битта тўпни олиб қўйди, аммо унинг ўрнига Трент майдонга эртароқ тушиши керакдек кўринди.
Гонсало Гарсия — 2,5. Энг катта савол — у майдонда 76 дақиқа қандай қолиб кетди? «Месталья»да Гонсало деярли кўринмади: эсга оладиган эпизод ҳам йўқ. 9 та яккакурашнинг 7 тасида ютқазди, бир-икки ҳужумни барбод қилди ва охири алмаштирилди.
“Zamin”ни Telegram'да ўқинг!
