Португалия терма жамоаси бош мураббийи Роберто Мартинес Криштиану Роналду қачон футболчилик фаолиятини якунлаши мумкинлиги ҳақидаги саволга муносабат билдирди. Бу ҳақда euro-football.ru хабар беради.
Февраль бошида 41 ёшни қарши олган юлдуз футболчининг жисмоний кўрсаткичлари ҳамон юқори эканини таъкидлаган мутахассис, якуний қарор вақт масаласи эканини айтди.
“Унинг жисмоний ҳолати яна, яна ва яна ўйнашга етади. Менимча, гап у қачон ўзи бунинг учун мос вақт келганини ҳис қилишида. Роналду жуда ўзига танқидий қарайдиган футболчи. У жамоага энди фойдаси тегмаётганини англаган пайтда, тўхташ бўйича қарор ҳам шунда қабул қилинади”, — деди Мартинес BBCга берган интервьюсида.
Клуб миқёсида Роналду “Ал-Наср” шарафини ҳимоя қилмоқда. Хабарларга кўра, португалиялик ҳужумчи шанба куни жамоа таркибига қайтиши кутилмоқда.
Аввалроқ Роналду клуб бошқарувидаги айрим қарорлардан норозилигини билдириб, бир неча учрашувларни ўтказиб юборгани қайд этилган.
“Ал-Фатех” — “Ал-Наср” учрашувини LiveResult платформасида матнли трансляция орқали кузатиш мумкин.
“Zamin”ни Telegram'да ўқинг!
