Барселона клубининг собиқ президенти Хосеп Мариа Бартомеу Винисиус Жуниор Реал Мадрид сафига қўшилишидан аввал каталонияликлар билан дастлабки келишувга эришганини маълум қилди. Ўша вақтда Бразилияда тўп сурган иқтидорли вингер учун Барселона вакиллари футболчининг оиласи ва агентлари билан музокаралар олиб борган эди. Бу ҳақда Goal.com хабар беради.
Бироқ, Реал Мадрид молиявий жиҳатдан анча жозибадор таклиф билан чиқди ва 2017-йилнинг май ойида Фламенго клуби билан келишувга эришди. Натижада, ўша пайтда 16 ёшда бўлган футболчи 2018-йилнинг июль ойида, яни 18 ёшга тўлганидан сўнг расман Мадрид жамоаси аъзосига айланди.
Бартомеу ЭСПН Депортес нашрига берган интервюсида шундай деди: "Винисиус Жуниор бизнинг қизиқишлар доирамизда эди. Биз унинг оиласи ва агентлари билан гаплашдик, ҳақиқатан ҳам дастлабки келишув мавжуд эди. Аммо Мадрид биздан кўра яхшироқ таклиф билан чиқди ва футболчини илиб кетди".
Винисиус Жуниор Мадрид клубидаги фаолияти давомида дунёнинг энг кучли ҳужумчиларидан бирига айланди. У барча мусобақаларда 372 та ўйинда майдонга тушиб, 127 та гол урди ва 100 та голли узатмани амалга оширди. Шунингдек, у 2022-йилги Чемпионлар лигаси финалида Ливерпул дарвозасига ягона ғалаба голини киритиб, жамоасининг соврин ютишида катта ҳисса қўшган.
“Zamin”ни Telegram'да ўқинг!
