Shols Zelenskiy bilan harakatlarni muvofiqlashtirishni muhokama qildi

^{Foto: REUTERS}
Germaniya kansleri Olaf Shols va Ukraina prezidenti Volodimir Zelenskiy 21 fevral, juma kuni kechqurun telefon orqali suhbatda Kiyev Rossiyaning Ukrainaga qarshi urushini toʻxtatish boʻyicha boʻlajak har qanday muzokaralarda ishtirok etishi kerakligini tasdiqladi.

Germaniya hukumati matbuot kotibi Shteffen Xebeshtraytning soʻzlariga koʻra, Shols va Zelenskiy «hozirgi harbiy va gumanitar vaziyat, shuningdek, Ukrainada adolatli tinchlik oʻrnatish yoʻllari»ni muhokama qilgan. Har ikki etakchi Evropa xavfsizligi masalalarini Evropa davlatlari bilan birgalikda muhokama qilish kerak degan fikrga kelishdi.

Xebeshtrayt shuningdek, telefon orqali suhbat chogʻida Shols Zelenskiyga «Germaniya Ukrainani Evropa va xalqaro hamkorlar bilan yaqindan muvofiqlashgan holda adolatli va mustahkam tinchlikka erishilgunga qadar qoʻllab-quvvatlashda davom etishiga» ishontirganini ta'kidladi.

AQShning Ukraina urushidagi pozitsiyasi

Avvalroq AQSh ma'muriyati Ukrainaning oʻzi va Evropa ishtirokisiz Rossiya bilan Ukraina kelajagi boʻyicha muloqotga kirishish tashabbusini ilgari surgan edi. 18 fevral kuni Vashington va Moskva Ar-Riyodda kelishmovchiliklarni bartaraf etish va Ukrainadagi urushni tezda tugatish uchun muzokaralar olib borishga kelishib oldi. Muhokama, jumladan, AQSh davlat kotibi Marko Rubio va Rossiya tashqi ishlar vaziri Sergey Lavrovni oʻz ichiga olgan, biroq Evropa va Ukraina vakillari taklif qilinmagan.

AQSh prezidenti Donald Tramp Rossiya prezidenti Volodimir Putin bilan yaqin orada uchrashishi mumkinligini ma'lum qildi. Shuningdek, u Zelenskiyni keskin tanqid qilib, uni «diktator» deb atadi va uning Ukraina muzokaralarida ishtirok etishi shart emas, degan fikrni bildirdi.

2022 yil fevral oyidan beri Ukraina Evropa davlatlari, shuningdek, sobiq prezident Jo Bayden boshchiligidagi AQShning avvalgi ma'muriyatining moliyaviy va harbiy koʻmagida Rossiyadan oʻzini himoya qilib kelmoqda. “Zamin” yangiliklarini “Telegram”da kuzatib boring