Kriptovalyuta bozoridagi “sovuq dush” yana qaytdi: bir haftaga yetmay, qariyb yarim trillion dollarga yaqin qiymat havoga uchdi. CoinGecko bergan ma’lumotga ko‘ra, 29 yanvardan buyon umumiy bozor qiymati 467,6 mlrd dollarga qisqargan.
Eng katta zarba esa an’anaviy ravishda bozor “lokomotivi” bo‘lgan bitkoinga to‘g‘ri keldi. U seshanba kuni Donald Tramp 2024 yil noyabr oyi boshida qayta saylanganidan keyingi eng past nuqtaga tushib ketgani aytilyapti. Shu jarayonda bitkoin AQSHda 15 oylik minimum — 72 877 dollargacha pastlab, keyin chorshanba kuni qisman tiklanib, London vaqti bilan ertalab 76 600 dollar atrofida savdolashgan.
Shu yerda eng og‘riqli savol chiqadi: “raqamli oltin” degan gap hali ham ishlayaptimi? Geosiyosiy keskinlik kuchaygan, xavfsiz aktivlarga talab ortishi kerak bo‘lgan paytda kripto qo‘llab-quvvatlov topmadi. Aksincha, maqolada aytilishicha, bitkoin va AQSH aksiyalari ham pasaygan, investorlar xavfsizroq aktivlarga “qochgan”.
Bu fonga Maykl Berrining ogohlantirishi ham qo‘shildi: u bitkoin qimmatbaho metallar kabi xedj vositasi sifatida o‘z o‘rnini topa olmayapti, ko‘proq spekulyativ aktiv sifatida “ochilib qolyapti”, degan mazmunda fikr bildirgan.
Bozordagi nervozlik fyucherslarda ham sezildi: so‘nggi 24 soatda 700 mln dollardan ortiq long/short pozitsiyalar majburiy yopilgan, 29 yanvardan beri umumiy “tozalash” 6,67 mlrd dollardan oshib ketgani qayd etilgan. Bitkoin ETFlarida ham oqimlar “sirpanchiq”: dushanba kuni 562 mln dollar sof kirim bo‘lgan bo‘lsa, seshanba kuni 272 mln dollar chiqim qayd etilgan.
Qisqasi, kayfiyat hozir “risk-off”. BTC Markets tahlilchisi Reychel Lukas bu holatni ehtiyotkor va himoyaviy ruhda deb ta’riflagan, 73 mingdan past ko‘rsatkichlar “ekstremal qo‘rquv”ni kuchaytirganini aytgan.
Kelajak uchun signal oddiy: kripto hali ham katta imkoniyat, lekin “xavfsiz port” deb ko‘r-ko‘rona ishonib bo‘lmaydi. Agar bozorga qayta ishonch qaytsin desak, u faqat xayp bilan emas — barqaror likvidlik, shaffof qoidalar va real talab bilan keladi. Hozircha esa kripto bozor bizga bitta narsani eslatyapti: bu yerda romantika kam, o‘zgaruvchanlik ko‘p.
“Zamin”ni Telegramʻda oʻqing!
