Toshkentdagi musiqa maktabiga Farrux Zokirov nomi beriladi
Toshkent shahrining Yashnobod tumanidagi 7-sonli bolalar musiqa va sanʼat maktabiga taniqli sanʼatkor Farrux Zokirov nomi berilishi rejalashtirilgan. Mazkur tashabbus doirasida maktabda "Yalla" ansambli, ijodiy laboratoriya hamda estradaga ixtisoslashgan mahorat maktablari tashkil etiladi. Shuningdek, iqtidorli yoshlar uchun bepul kurslar yoʻlga qoʻyiladi va muassasa zamonaviy texnik jihozlar bilan taʼminlanadi. Ushbu chora-tadbirlar orqali sanʼatkor merosini targʻib qilish va yosh isteʼdodlarni qoʻllab-quvvatlash koʻzlangan.
Toshkent shahrida joylashgan bolalar musiqa va san’at maktablaridan biriga Farrux Zokirov nomi berilishi rejalashtirilmoqda. Bu haqda Prezident tomonidan joriy yil 15 fevral kuni qabul qilingan qarorda ma’lum qilingan.
Mazkur hujjatga ko‘ra, Toshkent shahri Yashnobod tumanidagi 7-sonli bolalar musiqa va san’at maktabiga taniqli san’atkor nomi beriladi. Ushbu tashabbus ijodkor merosini keng targ‘ib qilish va uni yosh avlodga yetkazish maqsadini ko‘zlaydi.
Shuningdek, maktab faoliyatida bir qator yangiliklar joriy etiladi. Jumladan, “Yalla” nomidagi bolalar ansambli tashkil etilib, yoshlar ijodiy laboratoriyasi yo‘lga qo‘yiladi. “Ustoz-shogird” an’analari asosida estrada yo‘nalishida maxsus mahorat maktablari tashkil etilishi rejalashtirilgan.
Mazkur mahorat maktablarida faoliyat yurituvchi ustoz-ijodkorlar davlat budjeti hisobidan rag‘batlantirilib, ularga har oyda yuqori miqdorda haq to‘lanadi. Bu esa malakali mutaxassislarni jalb etish va sifatli ta’limni ta’minlashga xizmat qiladi.
Bundan tashqari, 2026/2027 o‘quv yilidan boshlab respublikaning turli hududlaridan iqtidorli o‘quvchilar saralab olinadi va ular uchun bepul estrada xonandaligi kurslari tashkil etiladi. Ushbu jarayon doirasida yozgi ijodiy to‘garaklar ham yo‘lga qo‘yiladi.
Maktabda zamonaviy ovoz yozish va tasvirga olish studiyasi barpo etilib, u sahna jihozlari va liboslar bilan jihozlanadi. O‘quvchilarning ijodiy ishlari esa televideniye va xalqaro onlayn platformalarda namoyish etib boriladi.
Ma’lum qilinishicha, Madaniyat vazirligi tomonidan maktab zarur musiqa asboblari, zamonaviy texnika vositalari hamda darslik va nota to‘plamlari bilan to‘liq ta’minlanadi. Bu kabi chora-tadbirlar yosh iste’dodlarni qo‘llab-quvvatlash va milliy san’atni yanada rivojlantirishga xizmat qiladi.
Izohlar 0
…