Shavkat Mirziyoyevning taklifiga binoan Imomali Rahmon 26 mart kuni davlat tashrifi bilan O‘zbekistonga tashrif buyurdi. Yuksak martabali mehmonni Toshkent-Humo xalqaro aeroportida shaxsan davlat rahbari kutib oldi.
Tojikiston yetakchisining mazkur tashrifi ikki davlat o‘rtasidagi munosabatlarda muhim siyosiy voqea sifatida baholanmoqda. Rasmiy kutib olish marosimi yuqori darajada tashkil etildi: ikki mamlakat bayroqlari baland ko‘tarildi, faxriy qorovul saf tortdi va davlatlararo hurmat ifodasi namoyon etildi.
Ma’lum qilinishicha, tashrif doirasida bugun ikki davlat rahbarlari o‘rtasida keng qamrovli muzokaralar bo‘lib o‘tadi. Shuningdek, ilk bor Oliy davlatlararo kengash yig‘ilishi ham o‘tkazilishi rejalashtirilgani e’tiborga molik.
Oliy darajadagi uchrashuvlarda siyosiy hamkorlik, savdo-iqtisodiy aloqalar, transport-kommunikatsiya tarmoqlari, madaniy-gumanitar munosabatlar hamda hududlararo hamkorlik masalalari atroflicha muhokama qilinishi kutilmoqda. Bu yo‘nalishlarda amaliy qadamlar belgilanishi ikki mamlakat uchun yangi imkoniyatlar eshigini ochishi mumkin.
Ekspertlar fikricha, mazkur tashrif nafaqat hozirgi aloqalarni mustahkamlaydi, balki O‘zbekiston va Tojikiston o‘rtasidagi strategik sheriklikni yanada yuqori bosqichga olib chiqishga xizmat qiladi. Bu esa kelajakda iqtisodiy o‘sish, savdo hajmini oshirish va mintaqaviy barqarorlikni ta’minlashda muhim omil bo‘lib xizmat qilishi kutilmoqda.
“Zamin”ni Telegramʻda oʻqing!
