Boks. Jalolov ikki karra jahon chempioni, Doʻsmatov va Moʻydinxoʻjaev jahon chempioniga aylandi
Toshkentda oʻtayotgan boks boʻyicha jahon chempionatida Oʻzbekiston milliy jamoasining uch nafar a'zosi finalga chiqib, 3ta oltin medaliga ega chiqdi.
Dastlabki jangda Asadxoʻja Moʻydinxoʻjaev Oʻzbekiston milliy jamoasi hisobida turnirdagi birinchi chempionlikni keltirdi. -67 kg vazn toifasidagi hamyurtimiz qozogʻistonlik Dulat Bekbauovga qarshi ringga koʻtarilib, raqibidan ustunligini koʻrsata oldi (5:0) va oltin medalga ega chiqdi.
Ikkinchi final jangida -51 kg vazn toifasidagi Hasanboy Doʻsmatov frantsiyalik Bilol Bennamaga qarshi ringga koʻtarilib, 1-raunddayoq raqibini nokautga uchratib, JCh-2023 oltin medaliga ega chiqdi.
«Humo Arena»da oʻtgan kunning soʻnggi final jangida eng ogʻir vazn toifasidagi oʻzbekistonlik charmqoʻlqop ustasi Bahodir Jalolov kubalik Alexandro Arzola Lopesga qarshi ringga koʻtarildi. Birinchi raunddayoq raqibidan yaqqol ustunlik qilgan 28 yoshli bokschi nokdaun evaziga turnirning oltin medalini qoʻlga kiritdi. Natijada, Bahodir ikki karra jahon chempioniga aylandi. U JCh-2019da ham oltin medalga ega chiqqandi.
Qayd etish joiz, final jangi oldidan bokschilarni qoʻllab-quvvatlash uchun Oʻzbekiston prezidenti Shavkat Mirziyoev ham «Humo Arena» saroyiga tashrif buyurdi.
Shu tariqa, Jalolov finalning dastlabki kunida Oʻzbekiston hisobiga 3-oltin medalni keltirdi. Ungacha Hasanboy Doʻsmatov va Asadxoʻja Moʻydinxoʻjaev faoliyatida ilk marta jahon chempioniga aylangandi. Bokschilar oltin medal bilan birga turnirning mukofot puli – 200 ming AQSh dollariga ham ega chiqishdi. Kumush medali sohiblari – 100 ming AQSh dollari, bronza egalari esa 50 ming AQSh dollari pul mukofotini qoʻlga kiritdi. Lazizbek Mullojonov va A'loxon Abdullaev yurtimiz hisobiga bronza medalini yozib qoʻyishdi.
Ma'lumot uchun, ertaga, 14 may kuni oʻzbekistonlik yana 4 nafar bokschi - Oybek Joʻraev, Abdumalik Xalokov, Ruslan Abdullaev va Saidjamshid Ja'farov final jangida ringga chiqishadi.
“Zamin” yangiliklarini “Telegram”da kuzatib boring
