Angliyalik iqtidorli vinger Anthony Gordon rasman Nyukasl Yunayted jamoasidan Barselona klubiga koʻchib oʻtdi. Transfer qiymati 69,3 million funt sterlingni (80 mln yevro) tashkil etdi va futbolchi Kataloniya grandi bilan besh yillik shartnoma imzoladi. Oʻtgan mavsumda "zagʻizgʻonlar"ning eng yaxshi toʻpurari boʻlgan 25 yoshli futbolchi oʻzining taqdimot marosimida ispan tilida ravon soʻzlab, barchani lol qoldirdi. Bu haqda Goal.com xabar beradi.
Juma oqshomida Kamp Nou stadionida boʻlib oʻtgan matbuot anjumanida sobiq Everton hujumchisi oʻzining til oʻrganish sirlari bilan oʻrtoqlashdi. Nyukasl Yunayted moliyaviy qoidalarga amal qilish maqsadida ushbu yirik sotuvga qoʻl urdi. Gordon esa jahon chempionati oldidan oʻzining bolalikdagi orzusini amalga oshirishga muvaffaq boʻldi.
Futbolchining soʻzlariga koʻra, u ushbu transferga bir necha yil davomida tayyorgarlik koʻrgan. "Men ispan tilida gapirishni xohlardim, chunki bolaligimdan Barselona safida toʻp surishimga ishonganman. Nyukasldagi fizioterapevtim bilan har kuni shugʻullandik va men unga bir kun kelib albatta ushbu klubda oʻynashimni aytgan edim", — deya taʻkidladi Gordon. Shuningdek, u muxlislarga katalon tilida ham murojaat qilib, oʻzining baxtli ekanini bildirdi.
Endilikda hujumchi bor eʻtiborini Angliya terma jamoasi safidagi xalqaro turnirga qaratishi lozim. Shimoliy Amerikadagi musobaqadan soʻng, u Barselona jamoasining murakkab taktik tizimiga moslashishi va oʻtgan mavsumdagi 17 ta golli natijasini Ispaniya chempionatida ham takrorlashi kutilmoqda.
“Zamin”ni Telegramʻda oʻqing!
