Tailandda maydonga yashin urdi: 24 yoshli futbolchi halok bo‘ldi

Tailandda havaskorlar futbol turniri fojia bilan yakunlandi. Naratxivat viloyatidagi stadionga yashin urishi oqibatida 24 yoshli futbolchi Safvan Avae vafot etdi, yana 12 kishi turli darajada jarohat oldi.

Hodisa kuchli yomg‘ir va momaqaldiroq paytida sodir bo‘lgan. Futbolchilar hali maydonda turgan vaqtda yerga urilgan yashin bir necha kishini bir vaqtning o‘zida zararlagan.

Fojia yarim final bahsidan keyin yuz bergan

Voqea 4 avgust kuni soat 17:30 atrofida Tailand janubidagi Sungaykolok shahrida joylashgan Santifap stadionida sodir bo‘lgan. U yerda Golok FA Cup 2026 havaskorlar turnirining SAMCOLTS hamda «Abu x Nong Sirin» jamoalari o‘rtasidagi yarim final uchrashuvi o‘tkazilgan.

Politsiya ma’lumotiga ko‘ra, bahs yakunlanganidan so‘ng kuchli yomg‘ir boshlangan va yashin maydonning markaziy qismiga urgan. Ayrim xorijiy nashrlar voqeani uchrashuv davomida sodir bo‘lgan deb yozmoqda. Har ikki holatda ham futbolchilar va musobaqa ishtirokchilari hali maydon hududida bo‘lgan.

Zarba ortidan Safvan Avae maydonga yiqilgan. Atrofdagilar unga birinchi yordam ko‘rsatishga uringan, keyin futbolchi og‘ir ahvolda shifoxonaga olib ketilgan.

Shifokorlarning sa’y-harakatlariga qaramay, uning hayotini saqlab qolish imkoni bo‘lmagan. Sungaykolok politsiyasi rahbari Tun Sirixunt futbolchi olgan og‘ir jarohatlar oqibatida vafot etganini tasdiqladi.

Jarohatlanganlar soni 12 nafarga yetdi

Hodisadan keyin dastlab turli manbalarda sakkiz yoki o‘n nafar kishi jabrlangani haqida xabarlar tarqalgan edi. Politsiya tomonidan taqdim etilgan yangilangan ma’lumotda esa Safvan Avaedan tashqari yana 12 kishi jarohat olgani qayd etildi.

Ular orasida SAMCOLTS safida to‘p tepgan 22 yoshli malayziyalik futbolchi Muhammad Alif Ezzaxan Zulkifli ham bor. Jabrlanganlar Sungaykolok shifoxonasiga yotqizilgan, ayrimlarida elektr zarbasi oqibatida kuyish alomatlari kuzatilgan.

Tayland politsiyasi voqea joyini ko‘zdan kechirib, hodisa holatlari bo‘yicha tekshiruv boshlagan. Musobaqa tashkilotchilarining ob-havo xavfiga qanday munosabat bildirgani va o‘yinni o‘z vaqtida to‘xtatish bo‘yicha qanday choralar ko‘rilgani hozircha batafsil ochiqlanmagan.

Yangi klubi bilan mavsumni boshlay olmadi

Safvan Avae qanot va hujum chizig‘ida harakat qila oladigan futbolchi edi. U avval «Pattani» klubi sharafini himoya qilgan, fojiadan oldin esa Tailand uchinchi divizionining janubiy mintaqasida qatnashuvchi «Yala» bilan shartnoma imzolagan.

Futbolchining yangi klubi ijtimoiy tarmoqda uning oilasi va yaqinlariga hamdardlik bildirib, Safvan xotirasini yodga oldi. U yangi jamoasidagi rasmiy mavsumni boshlashga ulgurmagan edi.

Tailand va Malayziya futbol jamoatchiligi vakillari ham fojiadan so‘ng ta’ziya bildirib, ochiq maydonlarda o‘tkaziladigan musobaqalarda xavfsizlik qoidalarini kuchaytirish zarurligini ta’kidlamoqda.

Momaqaldiroqda o‘yin qachon to‘xtatilishi kerak?

Ochiq futbol maydoni momaqaldiroq paytida eng xavfli hududlardan biri hisoblanadi. Yashin faqat bevosita insonga urishi shart emas — elektr oqimi nam yer orqali tarqalib, yaqin atrofdagi bir nechta kishini ham jarohatlashi mumkin.

AQSH Kasalliklarni nazorat qilish va profilaktika markazi momaqaldiroq ovozi eshitilishi bilan ochiq maydondagi mashg‘ulot yoki musobaqani to‘xtatishni tavsiya etadi. Faoliyatni so‘nggi momaqaldiroq ovozidan kamida 30 daqiqa o‘tgachgina davom ettirish mumkin. Sport inshootlarida esa oldindan tayyorlangan evakuatsiya rejasi va yopiq xavfsiz joy bo‘lishi lozim.

Sungaykolokdagi fojia yana bir bor bir haqiqatni eslatdi: o‘yinning darajasi yoki natijasi qanday bo‘lishidan qat’i nazar, momaqaldiroq boshlangan paytda futbol maydonida qolishga arziydigan birorta sovrin yo‘q. Fikringizni izohda qoldiring va maqolani sport ishqibozlariga Telegram yoki boshqa ijtimoiy tarmoqlarda ulashing!