Sud AQSh Atrof-muhitni muhofaza qilish agentligining 20 milliard dollarlik qarorini bekor qildi

AQSh apellyatsiya sudi seshanba kuni maʼlum qilishicha, Donald Tramp maʼmuriyati iqlim yoʻnalishidagi nodavlat notijorat tashkilotlariga avvalroq ajratilgan mablagʻlarni bekor qilish va qaytarib olish vakolatiga ega boʻlmagan. ixbt.com va The New York Times nashrlari xabar qilishicha, sakkizta nodavlat tashkilot oʻz bank hisoblariga oʻtkazilgan milliardlab mablagʻlardan foydalanish huquqini tiklashga harakat qilgan edi. Bu haqda Techcrunch.com xabar beradi.

Joriy yilning fevral oyida Atrof-muhitni muhofaza qilish agentligi (EPA) rahbari Li Zeldin, shuningdek Federal qidiruv byurosi va Moliya vazirligi koʻrsatmasiga binoan Citibank ularning hisob raqamlarini muzlatib qoʻygan edi. Sud qarori EPA AQSh Oliy sudiga apellyatsiya shikoyatini kiritish masalasini hal qilguniga qadar mazkur tashkilotlarga oʻz mablagʻlaridan foydalanish imkoniyatini taqdim etadi.

Sud qarorining huquqiy asoslari

Kolumbiya okrugi boʻyicha Apellyatsiya sudining oʻnta sudya hayʼatidan olti nafari mablagʻlarni qaytarib olishni toʻxtatib turuvchi taqiqlovchi buyruqni oʻz kuchida qoldirishni yoqlab ovoz berdi. Sudyalarning taʼkidlashicha, EPA mablagʻlarni tortib olishga urinishni «faqatgina siyosiy kelishmovchilik» sababli amalga oshirgan va bu harakat noqonuniy hisoblanadi.

Bahsli mablagʻlar «Inflyatsiyani pasaytirish toʻgʻrisida»gi qonun (IRA) doirasida toza energiya rivojlanishini ragʻbatlantirish uchun moʻljallangan 20 milliard dollarlik Greenhouse Gas Reduction Fund jamgʻarmasini yaratish uchun ajratilgan edi. Ushbu mablagʻlarning katta qismi biznes va jamoalarga qazilma yoqilgʻilardan voz kechishga yordam beradigan qarz mexanizmlarini yaratishga yoʻnaltirilishi koʻzda tutilgandi.

Tashkilotlar duch kelgan qiyinchiliklar

Tramp maʼmuriyatining EPA idorasi mablagʻlarni qaytarib olish vakolatiga egaligini, chunki yangi qabul qilingan One Big Beautiful Bill Act (OBBBA) qonuni Greenhouse Gas Reduction Fund dasturini yaratgan qismni bekor qilganini vaj qilib koʻrsatgan. Biroq sudya hayʼati mablagʻlar allaqachon majburiyat sifatida shakllantirilib, tashkilotlar hisob raqamlariga oʻtkazib berilgani sababli OBBBA ularni qaytarib olish uchun asos boʻla olmasligini uqtirdi.

Garchi nodavlat tashkilotlar ushbu sud qarorini mamnuniyat bilan kutib olgan boʻlsa-da, koʻpchilik uchun bu qadam biroz kechikkan boʻlishi mumkin. Hisob raqamlari muzlatib qoʻyilgan davrda ular jiddiy moliyaviy qisqartirishlarga borishga majbur boʻlgan. Jumladan, Climate United rahbari mart oyida isteʼfoga chiqqan va uning oʻrniga hamon yangi rahbar tayinlanmagan, Power Forward Communities tashkilotida esa atigi ikki nafar xodim qolgan.