Vivo kompaniyasi shu oy oxirida taqdim etilishi kutilayotgan Vivo S60 turkumidagi smartfonlar haqida ilk rasmiy ma’lumotlarni oshkor qildi. Yangi liniyaga Vivo S60 va Vivo S60e modellari kirishi kutilmoqda, biroq S60 Pro Mini versiyasi borasidagi xabarlar hali o‘z tasdig‘ini topmagan. Bu haqda Ixbt.com xabar beradi.
Yangi smartfonlar tekis ekran va ekranga o‘rnatilgan o‘ta tezkor ultratovushli barmoq izi skaneri bilan jihozlanadi. Vivo ta’kidlashicha, mazkur datchik qurilmani atigi 0,1 soniyada qulfdan chiqarish imkonini beradi, barmoq izini ro‘yxatdan o‘tkazish jarayoni esa bor-yo‘g‘i 1 soniyani talab qiladi.
Texnik jihatdan qurilmalar 7200 mA·soat sig‘imli akkumulyator va 90 W quvvatda tezkor quvvatlash texnologiyasi bilan ta’minlanadi. Shuningdek, smartfonlar stereo dinamiklar, X-o‘qi bo‘ylab chiziqli vibratsiya motori, IR-port hamda IP68/IP69 standartidagi suv va changdan himoya tizimiga ega bo‘ladi.
Kompaniya tomonidan e’lon qilingan dizayn tasvirlariga ko‘ra, qurilma orqa panelida uchta kameradan iborat modul joylashgan. Xabarlarga ko‘ra, ushbu tizim tarkibidan Sony IMX8 datchigiga ega periskopik telefoto kamera ham o‘rin oladi.
“Zamin”ni Telegramʻda oʻqing!
