Rossiya hukumati kiberfiribgarlikka qarshi kurashish doirasida aloqa xizmatlari koʻrsatish boʻyicha shartnomalarni bekor qilishning minimal muddatini belgilashni rejalashtirmoqda. Bosh vazir oʻrinbosari Dmitriy Grigorenkoning soʻzlariga koʻra, ushbu chora firibgarlarning oʻz jinoyatlari uchun foydalangan raqamlardan tezda qutulishiga yoʻl qoʻymaydi. Bu haqda Ixbt.com xabar beradi.
Yangi qoidaga koʻra, aloqa xizmatlari uchun tuzilgan shartnomani faqat u rasmiylashtirilganidan keyin 90 kun oʻtgach bekor qilish mumkin boʻladi. Bu muddat firibgarlik holatlarini aniqlash va aybdorlarni kuzatish jarayonini osonlashtirishi kutilmoqda. Grigorenko ushbu chorani kiberfiribgarlikka qarshi kurashning ikkinchi paketiga kiritilgan muhim band deb atadi.
Shu bilan birga, qonun loyihasida oddiy foydalanuvchilarning huquqlari ham hisobga olingan. Aloqa operatorlari abonent xizmatdan voz kechishga qaror qilgan zahoti toʻlov undirishni toʻxtatishga majbur boʻladilar. Shu sababli, hukumat vakilining taʼkidlashicha, oddiy fuqarolar uchun hech qanday qoʻshimcha cheklovlar yoki moliyaviy yuklar yuzaga kelmaydi.
Kiberfiribgarlikka qarshi kurash boʻyicha birinchi chora-tadbirlar paketi 2025-yilning bahorida qabul qilingan edi. 30 dan ortiq turli choralarni oʻz ichiga olgan ushbu qonun loyihasi firibgarlik sxemalarini murakkablashtirish va raqamli xavfsizlikni taʼminlashga qaratilgan.
“Zamin”ni Telegramʻda oʻqing!
