Xalqaro energetika agentligining (IEA) yangi hisobotiga koʻra, elektromobillar bozoridagi tushkunlik faqat AQSHga xos muammo boʻlib qolmoqda. Dunyoning qolgan qismida esa ushbu transport vositalariga talab keskin ortib bormoqda. Oʻtgan yili global miqyosda 20 milliondan ortiq elektromobil sotilib, ular umumiy bozorning 25 foizini egalladi. Xitoyda oʻsish surʼatlari eng yuqori koʻrsatkichni qayd etgan boʻlsa, Lotin Amerikasida savdo hajmi 75 foizga oshdi. Bu haqda Techcrunch.com xabar beradi.
AQSHda esa vaziyat birmuncha turgʻun: elektromobillarning bozor ulushi 10 foiz atrofida toʻxtab qolgan. Mutaxassislar buni "K-simon" rivojlanish deb atashmoqda, yaʼni bir guruh davlatlar yuqoriga qarab oʻssa, boshqalari pastga shoʻngʻimoqda. AQSHdagi pasayishga soliq imtiyozlarining bekor qilinishi va Xitoy avtomobil ishlab chiqaruvchilariga qoʻyilgan toʻsiqlar sabab boʻlmoqda. Bu holat Rivian va Lucid kabi startaplar uchun qiyinchilik tugʻdirsa-da, Tesla va anʼanaviy brendlar strategiyasini qayta koʻrib chiqishga majbur qilmoqda.
Xitoyda sotilgan elektromobillarning uchdan ikki qismi anʼanaviy yonilgʻida ishlaydigan avtomobillardan arzonroq ekani sohani harakatlantiruvchi asosiy kuch boʻldi. Xitoy kompaniyalari Janubi-sharqiy Osiyo va Yevropa bozorlarini ham faol egallamoqda. Masalan, Tailandda soʻnggi ikki yil ichida elektromobillar narxi ichki yonuv dvigatelli mashinalar bilan tenglashdi, bu esa rivojlanayotgan iqtisodiyotlar uchun elektromobillar qimmatlik qilishi haqidagi nazariyani yoʻqqa chiqardi.
Biroq, bu shiddatli oʻsish doimiy boʻlmasligi mumkin. Xitoylik ishlab chiqaruvchilar xorijiy bozorlarga talabdan 25 foiz koʻproq avtomobil eksport qilgan, bu esa dilerlik markazlarida zaxiralar toʻplanib qolishiga olib kelishi mumkin. Shuningdek, koʻplab davlatlar oʻz ichki bozorini himoya qilish maqsadida arzon Xitoy elektromobillariga nisbatan yangi bojxona tariflarini joriy etishni rejalashtirmoqda.
“Zamin”ni Telegramʻda oʻqing!
