Inson bilan koʻz orqali muloqot qiluvchi dunyodagi ilk robot taqdim etildi

Noetix kompaniyasi dunyodagi ilk koʻz orqali oʻzaro aloqaga kirishuvchi yuqori realistik bionik robotni namoyish etdi. Ushbu model oʻzining insoniy dizayni va murakkab harakatlanish tizimi bilan ajralib turadi. Robot jami 24 darajali erkinlikka ega boʻlib, shundan 6 tasi koʻzlar, 4 tasi qoshlar, 11 tasi ogʻiz va 3 tasi boʻyin harakatlari uchun masʼuldir. Bu haqda Ixbt.com xabar beradi.

Yangi qurilma nafaqat ovozni qayta hosil qiladi, balki lab harakatlari, nigohlar va yuz ifodalari orqali tabiiy multimodal muloqotni taʼminlaydi. Maxsus koʻnikmalar kutubxonasi yordamida robot suhbatdosh bilan hissiy bogʻliqlik oʻrnata oladi, bu esa uni oddiy mashinalardan tubdan farqlaydi.

Robot kuchli semantik tushunish qobiliyatiga ega boʻlib, u soʻzlarning shunchaki grammatik shaklini emas, balki ularning asl maʼnosini anglaydi. Bu esa inson bilan muloqotni yanada jonli va samimiy qiladi. Shuningdek, u turli his-tuygʻularni realistik tarzda ifodalash imkoniyatiga ega.

Rasmiy maʼlumotlarga koʻra, ushbu bionik robotdan oilaviy muloqot, mehmonxonalarda mijozlarni kutib olish (reception) hamda koʻrgazma zallarida eksponatlarni namoyish etish kabi turli sohalarda foydalanish mumkin.