Hindiston sudi Google kompaniyasining kalit soʻzlar orqali reklama berish amaliyotiga qarshi chiqargan qarori texnologiya olamida katta shov-shuvga sabab boʻldi. Mahalliy tadbirkorlar va yirik kompaniya asoschilari Google tizimidan raqobatchilar mijozlarni oʻgʻirlash va brendlarni oʻz nomini himoya qilish uchun pul toʻlashga majburlashda foydalanayotganini taʼkidlamoqda. Bu haqda Techcrunch.com xabar beradi.
Dehli Oliy sudi Hindware brendi bilan bogʻliq nizoda Google kompaniyasini savdo belgisiga doir huquqlarni buzganlikda aybdor deb topdi va 3 million rupiya (taxminan 31,600 dollar) miqdorida jarima belgiladi. Sudya Mini Pushkarna Google shunchaki passiv vositachi ekani haqidagi vajlarni rad etib, Google Ads platformasi raqobatchilarga boshqa brend nomlaridan kalit soʻz sifatida foydalanishga imkon berayotganini taʼkidladi.
Ushbu qaror Zerodha asoschisi Nithin Kamath va Zoho rahbari Sridhar Vembu kabi taniqli tadbirkorlar tomonidan qoʻllab-quvvatlandi. Kamathning soʻzlariga koʻra, foydalanuvchi Google orqali aniq bir brendni qidirganda, birinchi natijalar koʻpincha raqobatchilarning reklamasi boʻlib chiqadi, bu esa kompaniyalarni oʻz brendi ustidan nazoratni saqlab qolish uchun Google platformasiga ortiqcha mablagʻ sarflashga majbur qiladi.
Google vakillari esa oʻz navbatida kompaniya siyosati raqobatchilarga reklama matnida savdo belgilaridan foydalanishga ruxsat bermasligini va bu qoida butun dunyoda amal qilishini bildirdi. Kompaniya mahalliy qonunchilikka muvofiq ish yuritishini va foydalanuvchilar manfaatlarini himoya qilishda davom etishini maʼlum qildi.
Hindiston Google uchun Xitoydan keyingi eng yirik bozor hisoblanadi, shuning uchun qidiruv va reklama biznesiga daxldor har qanday sud qarori texnologiya giganti uchun strategik ahamiyatga ega. Huquqshunoslar ushbu qaror kelajakda raqamli marketing va intellektual mulk huquqi boʻyicha yangi pretsedent yaratishi mumkinligini aytishmoqda.
“Zamin”ni Telegramʻda oʻqing!
