Дин ишлари бўйича қўмита 2026 йилги Рамазон ойига тайёргарлик доирасида Ўзбекистон мусулмонлари идораси ҳамда тегишли идоралар томонидан кўрилган ташкилий чоралар ҳақида маълумот берди. Қайд этилишича, “Муборак Рамазон ойини муносиб тарзда ўтказиш тўғрисида”ги президент қарори асосида фазилатли ойда ишлар «Рамазон – меҳр-мурувват, аҳиллик ва шукроналик ойи» ғояси руҳида амалга оширилади.
Энг асосий масалалардан бири — масжидларда таровиҳ намозлари ва «Хатми Қуръон» тадбирларини тизимли ташкил этиш. Маълум қилинишича, Рамазон ойида Ўзбекистонда фаолият юритаётган 2 148 та масжиддан 2 101 тасида таровиҳ намозлари ўқилади. Шундан 1 762 тасида тўлиқ хатмона — «Хатми Қуръон» тадбирлари ўтказилади. Бу жараёнга 3 642 нафар иқтидорли қори саралаб олингани ҳам айтилди.
Сўнгги йиллардаги ижобий тажрибага таянилган ҳолда, бу йил ҳам «Хатми Қуръон» тадбирлари барча масжидларда бир вақтнинг ўзида бошланиши режалаштирилган. Якуни эса Рамазоннинг 27-куни — тахминий «Қадр кечаси»га тўғри келиши белгиланган. Яъни, хатм ҳам, умумий руҳият ҳам бир маромда, бир хил тартибда бориши кўзда тутилмоқда.
Таровиҳ намозларига келсак, улар бугун — 18 феврал куни хуфтон намозидан кейин бошланади. Идора маълумотига кўра, таровиҳнинг бошланиш вақтлари шарқий ҳудудларда 20:20 дан бошланиб, ғарбий ҳудудларда 21:00 гача чўзилади. Тошкент вилояти ва Тошкентда эса таровиҳ намозлари 20:30 да бошланиши белгиланган.
Шу билан бирга, Ўзбекистон мусулмонлари идораси таровиҳ намозларида ўқиладиган «Хатми Қуръон» саҳифаларининг кунлик тақсимотини ҳам эълон қилган. Бу — ҳар куни қайси ҳажмда ўқилади, қай тартибда кетади, деган саволларга олдиндан аниқ жавоб, яъни масжидлардаги умумий мувофиқлашувни кучайтирадиган қадам.
Тадбирларни тартибли ва хавфсиз ўтказиш масаласи ҳам алоҳида эътиборда: таровиҳ ва хатм кечаларида жамоат тартибини таъминлаш учун Ички ишлар вазирлиги, Миллий гвардия, Ёнғин хавфсизлиги хизмати ходимлари жалб этилади. Шунингдек, 2 104 та махсус техника сафарбар қилиниши қайд этилган.
Хулоса қилиб айтганда, бу йил Рамазон нафақат ибодат, балки тартиб-интизом, бирдамлик ва меҳр-оқибатни кучайтириш руҳида ўтишини кўрсатадиган тайёргарлик кўлами сезиляпти. Энди энг муҳими — ҳар бир масжидда ҳам маънавият, ҳам хавфсизлик, ҳам ҳурмат бирдек ушлаб борилсин.
