Ўзбекистон Президентининг 2026 йил 25 мартдаги ПҚ–110-сонли қарори асосида “Эко-маданият” умуммиллий лойиҳаси доирасида мамлакатда экологик таълим, илм-фан ва ижтимоий тарғиботни фаоллаштириш бўйича комплекс чора-тадбирлар белгиланди. Мақсад – республиканинг барча ҳудудларида табиатни асраш ва барқарор ривожланиш учун малакали кадрларни тайёрлаш тизимини кенгайтириш.
Қарорга мувофиқ, 2026–2027 йилларда республикадаги ҳар бир минтақада 14 та “яшил” техникум ташкил этилиши режалаштирилган. Ушбу таълим муассасаларида ҳудудларнинг экологик, ижтимоий ва иқтисодий эҳтиёжларидан келиб чиқиб, малакали ва замонавий мутахассислар тайёрланади. Бу эса ёшларнинг касбий билимлари ва амалиёт кўникмаларини ошириб, уларни замонавий талабларга мослаштиришга хизмат қилади.
Шунингдек, 2030 йилга қадар бу техникумларда жами 10 минг нафар ўрта бўғин кадрлари тайёрланиши орқали мамлакатда экологик таълим тизими янада ривожлантирилади ва атроф-муҳитни муҳофаза қилиш соҳасида профессионал кадрлар захираси яратилади.
Қарорнинг яна бир муҳим йўналиши сифатида 2026–2028 йилларда экология, табиатни муҳофаза қилиш ва иқлим ўзгариши соҳасида илмий даража олган мутахассислар сонини 150 нафарга етказиш вазифаси белгиланган. Бу чора-тадбирлар ёш олимлар ва мутахассисларни илмий фаолиятга жалб этишни ҳам назарда тутади.
2026-2027 ўқув йилидан бошлаб айрим таълим муассасалари “яшил” техникумлар сифатида қайта ташкил этилади. Уларнинг моддий-техника базасини мустаҳкамлаш ва таълим сифатини ошириш мақсадида ушбу техникумлар Касбий таълим агентлиги билан ҳамкорликда Марказий Осиё атроф-муҳит ва иқлим ўзгаришини ўрганиш университетига бириктирилади. Бу эса олий таълим муассасалари билан узвий боғлиқликни кучайтириб, билим ва амалиёт интеграциясини таъминлайди.
Шу тариқа, “яшил” техникумлар лойиҳаси орқали Ўзбекистонда экологик таълим тизими фаоллаштирилади, малакали кадрлар захираси яратилади ва келгусида барқарор атроф-муҳитни муҳофаза қилиш бўйича мустаҳкам замин тайёрланади.
“Zamin”ни Telegram'да ўқинг!
