Зеленский: «Умид қиламизки, уруш бу йил якунланади»

Киевда Европа Иттифоқи етакчилари билан ўтказилган қўшма матбуот анжуманида норвегиялик журналист Украина президенти Владимир Зеленскийдан мамлакат ва унинг халқи учун келажак режалари ҳақида савол берди.

Зеленский: Урушни бу йил тугатишни хоҳлаймиз

Журналистнинг «Уч йилдан бери давом этаётган кенг кўламли урушдан сўнг Украина ва унинг халқи учун қандай режалар бор?» деган саволига Зеленский шундай жавоб берди:

«Умид қиламизки, биз бу урушни уч йилдан кейин эмас, шу йил якунлай оламиз».

Президентга кўра, Украина ҳозирда Россия ҳужумларининг олдини олиш учун хавфсизлик кафолатларига муҳтож. Унинг фикрича, мамлакатнинг Европа Иттифоқи ва НАТОга қўшилиши бу борада муҳим қадам бўлиши мумкин.

Зеленский: «АҚШ ёрдам беришда давом этади деб умид қиламиз»

Матбуот анжуманида Зеленскийдан АҚШ президенти Доналд Трамп билан муносабатлари ҳақида ҳам сўралди.

«Биз умид қиламизки, АҚШ барча шериклар каби ёрдам беришда давом этади», — деди Украина раҳбари.

Шунингдек, у Европа ва Америка ўртасидаги бирликни сақлаб қолиш муҳимлигини таъкидлади: «Биз Европа ва АҚШ ўртасидаги бирликни йўқотмаслигимиз керак».

Зеленскийнинг таъкидлашича, Украина урушни тезроқ тугатишга ҳаракат қилмоқда, шунинг учун халқаро шериклар билан ҳамкорлик давом эттирилиши лозим. НАТО ва Европа Иттифоқига қўшилиш Украина учун келажакдаги хавфсизликни кафолатлайдиган муҳим йўналишлардан бири бўлиши мумкин. “Замин” янгиликларини “Telegram”да кузатиб боринг