АҚШ давлат котиби Россия–Украина урушининг қачон якунланиши ҳақида гапирди

АҚШ давлат котиби Марко Рубио Россия–Украина урушининг қачон якун топиши Вашингтонга эмас, балки Москва ва Киевга боғлиқ эканлигини таъкидлади.

Тинчлик музокаралари давом этмоқда

Рубио журналистлар учун ўтказилган брифингда Америка тинчликка эришишга ҳаракат қилаётганини ва урушни тугатиш йўлида "қанча вақт талаб этилса, шунча давом этиши"ни таъкидлади. У, шунингдек, Вашингтон сўнгги бир ой ичида ҳарбий можарода иштирок этаётган томонлар билан олиб борилган музокаралар ҳақида аниқ муддатлар бера олмаслигини билдирди.

"Бу келишув бир ҳафта ёки бир ой ичида имзоланади, деб кафолат бера олмайман. Бу бизга эмас, руслар ва украинларга боғлиқ," — деди АҚШ давлат котиби.

Музокаралар ва санкциялар масаласи

Рубио АҚШ ва Европа Иттифоқи томонидан жорий этилган санкциялар ҳар қандай келишувнинг муҳим қисми бўлишини таъкидлади. Шу билан бирга, у Россия музокараларни атайлаб чўзаётгани ҳақидаги иддаоларни тасдиқлашдан бош тортди, аммо уруш "мураккаб" эканини эътироф этди.

"Мен ҳеч қачон бу жараён осон бўлади, деб айтмаганман. Айниқса, биз бир неча йилдан бери мулоқотда бўлмаган Россия билан ишлаш осон эмас," — деди у.

Томонлар қандай келишувларга эришди?

АҚШ, Россия ва Украина ўртасидаги тинчлик музокаралари 2024 йил феврал ойида бошланган. Шундан бери:

• Россия ва Украина АҚШнинг энергетика инфратузилмаларига зарба бермаслик таклифига рози бўлди.
  
• АҚШ ва Украина Қора денгиз бўйича сулҳ тузишга келишиб олди.
  
• Россия қишлоқ хўжалиги маҳсулотлари экспортчиларига санкциялар олиб ташланса ва "Росселхозбанк" SWIFT тизимига уланса, Қора денгиз бўйича келишувга рози бўлишини билдирди.
  

Шунингдек, Доналд Трамп, Владимир Путин ва Володимир Зеленский ўртасида бир неча телефон мулоқотлари ўтказилган, Саудия Арабистонида уч томонлама музокаралар ташкил этилган.

Гарчи АҚШ тинчлик музокараларида фаол иштирок этаётган бўлса-да, давлат котиби Рубионинг таъкидлашича, урушнинг қачон тугаши тўғридан-тўғри Москва ва Киев қарорларига боғлиқ. АҚШ дипломатик йўл билан ҳаракат қилишга тайёрлигини билдирди, бироқ Россиянинг музокараларга қандай ёндашиши ва Европанинг санкциялар сиёсати бу жараённинг тез ёки секин боришига таъсир кўрсатади. “Замин” янгиликларини “Telegram”да кузатиб боринг