Трамп Путиннинг Украинага доир ҳаракатларидан норози

АҚШ президенти Доналд Трамп Россия раҳбари Владимир Путиннинг Украина бўйича сўнгги баёнотларидан дарғазаб бўлди.

Путин ўтган ҳафтада Украина президенти Владимир Зеленскийнинг ҳокимият легитимлигини шубҳа остига олиб, БМТ, АҚШ ва Европа Иттифоқи шафелигида Украинада муваққат бошқарув ўрнатишни таклиф қилганди.

Бу ҳаракат Трампга ёқмаган, айниқса, у сайловолди кампаниясида Украинадаги урушни 24 соат ичида тўхтатишга ваъда берганини ҳисобга олсак, Кремлнинг тинчлик музокараларини чўзишга уринаётгани унинг сабрини тугатмоқда.

Трамп Россияга таҳдид қилди

АҚШ президенти Россия Украинанинг ҳудудий яхлитлиги ва тинчлик шартларини тан олмаса, Москвадан келаётган нефтга иккиламчи божлар жорий этишини маълум қилди:

"Агар биз Россия билан Украинада хунрезликни тўхтатиш борасида келиша олмасак ва бу ҳол Россиянинг айби билан рўй берса, мен Россиядан келаётган нефтга иккиламчи божлар жорий қиламан", — деган Трамп.

Москва оташкесим таклифини пайсалга солмоқда

Таҳлилчиларга кўра, Кремл Вашингтон томонидан илгари сурилаётган вақтинчалик ўт очишни тўхтатиш ва доимий оташкесим бўйича музокара таклифини рад этмасдан, бироқ чўзиб келмоқда. Бу эса Трампнинг Путинга нисбатан муносабатини салбий томонга ўзгартираётганини кўрсатмоқда.

Айни пайтда, Трамп Украина президенти Владимир Зеленскийни ҳам танқид қилиб, уни фойдали қазилмалар тўғрисидаги битимни йўққа чиқаришда айблаган.

Трамп ва Путин учрашуви февраль ойи охирига режалаштирилган

Президент лавозимига киришганидан сўнг Трамп Путин билан телефон орқали мулоқот қилган ва Украинада тез орада тинчлик ўрнатилишини ишора қилганди.

Сўнгги хабарларга кўра, икки давлат раҳбарининг учрашуви февраль ойи охирига мўлжалланган, аммо музокараларнинг нақадар самарали бўлиши Кремлнинг ён босишига боғлиқ бўлиб қолмоқда. “Замин” янгиликларини “Telegram”да кузатиб боринг