Tesla Cybertruck соҳибининг “қайиқ” орзуси уни 100 минг доллардан жудо қилди

Tesla компаниясининг инновацион Cybertruck пикапи ҳали бозорга чиқмасданоқ кўпчиликнинг диққат марказига айланганди. Бунга сабаб эса Илон Маскнинг «ушбу автомобиль ҳатто сувда ҳам ҳаракатлана олади, дарё ва кўллардан кечиб ўтишга қодир» деган баёнотлари бўлган эди. Афсуски, АҚШдаги Cybertruck соҳибларидан бири ушбу ваъдаларга ишониб, ўзининг пикапини «қайиқ» сифатида ишлатишга уринди ва оқибатда 100 минг доллар миқдорида зарар кўрди, дея хабар бермоқда маҳаллий матбуот.

Калифорниянинг Траки шаҳрида истиқомат қилувчи Cybertruck эгаси пикапнинг махсус «кечув режими»ни ишга тушириб, дарёдан кечиб ўтишга уринган. Бироқ тез орада электр транспорти сув ичида қолиб, ҳаракатдан тўхтаган. Воқеа жойига етиб келган Калифорния патрул хизмати ходимлари ушбу автомобилни сувдан чиқаришга ёрдам берган. Улар ҳайдовчига Tesla'нинг «кечув режими» сув остида тўлиқ ҳаракатланишни кафолатламаслигини ва бу ҳолат ишлаб чиқарувчи кафолатига ҳам кирмаслигини тушунтиришган.

^{Фото: Electrek}
Ҳозирча ушбу воқеада Cybertruck қанчалик зарарлангани ҳақида аниқ маълумотлар йўқ. Аммо дастлабки ҳисоб-китобларга кўра, автомобилга етган зарар миқдори тахминан 100 минг долларга баҳоланмоқда.

Tesla раҳбари Илон Маск аввал ҳам бир неча бор ўз автомобилларининг қисқа вақт давомида сувда ҳаракатлана олиш қобилияти ҳақида баёнотлар берган. Айниқса, Cybertruck ҳақидаги тақдимотларда Маск ушбу пикап дарё ва кўлларни кечиб ўтиш учун етарлича сув ўтказмаслик хусусиятига эгалигини алоҳида қайд этганди.

^{Фото: Electrek}
Бироқ Tesla компанияси бу функцияни фақат махсус йўлсизлик шароитлари учун таклиф этган эди ва у орқали сувда ҳаракатланиш кафолатланмаган. Cybertruck соҳиблари бундай имкониятдан фойдаланиш учун бутун масъулият ўз зиммаларида бўлишини тан олишлари керак бўлган.

Бу воқеа кўплаб ҳайдовчилар учун муҳим сабоқ бўлиб, ҳатто энг инновацион автомобиллар ҳам ишлаб чиқарувчи кўрсатмалари доирасида фойдаланилмаса, жиддий зарар кўриши мумкинлигини яна бир бор кўрсатди. «Замин»ни Telegram’да ўқинг!