Путин ва Зеленский учрашуви фақат бир шарт билан амалга ошиши мумкин

Россия ва Украина ўртасидаги қуролли тўқнашувга барҳам бериш масаласи бўйича юзма-юз музокаралар эҳтимоли яна кун тартибига чиқмоқда. Кремль матбуот котиби Дмитрий Песков 20 май куни берган баёнотида Россия президенти Владимир Путин ва Украина раҳбари Владимир Зеленский ўртасида учрашув фақатгина аниқ келишувлар натижаси сифатида амалга ошиши мумкинлигини билдирди.

“Натижа бўлмас экан, учрашув ҳам бўлмайди”

Песковнинг таъкидлашича, икки давлат делегациялари олдиндан муайян келишувларга эришган тақдирдагина президентлар учраши мумкин:

“Биз бундай юзма-юз учрашувни музокара жараёнида эришилган натижа сифатида кўришимиз мумкин. Лекин гап фақат имзо ва расмият эмас – Украина томонидан ким ва қандай мандат билан бу ҳужжатни тасдиқлаши ҳам жуда муҳим.”

Москвадан Истанбулга – жиддийлик синовида

Россия 16 май куни Истанбулда ўтказилган икки томонлама учрашувда ўз делегациясига президент ёрдамчиси Владимир Мединскийни бош қилиб юборди. Бу қадам Украинада жиддий қабул қилинмади. Зеленскийнинг баёнотига кўра, агар Путиннинг ўзи музокараларга келмаса, бу Кремлнинг жараёнга жиддий қарамаётганини англатади.

Шу билан бирга, Украина барибир музокарада иштирок этишни маъқул деб топди. The Economist нашри эса Истанбул музокаралари давомида Россия томони бир қатор таҳдидлар билдирганини, хусусан Харьков ва Суми вилоятларини эгаллаб олиш нияти ҳақида сўз кетганини ёзди.

Путин 30 кунлик сулҳни рад этди

Россия раҳбари илгари Европа Иттифоқи давлатлари ва Украина томонидан таклиф қилинган 30 кунлик ўт очиш тўхтатиш таклифини қабул қилмаган. У Истанбул музокаралар форматига қайтишни таклиф этган, бироқ у музокараларда шахсан иштирок этмаган.

Zamin.uz таҳририятидан:

Ҳозирча икки етакчи ўртасида учрашув бўлиши фақат бир шартга – делегациялар даражасидаги аниқ натижага боғлиқ. Бу орада эса уруш майдонларида воқеалар давом этмоқда. Сиз Путин ва Зеленский музокараси рўй берса, тинчлик сари қадам ташлана олади деб ўйлайсизми? «Замин»ни Telegram’да ўқинг!