Покистонда ИШИДнинг хавфли етакчиси қўлга олинди: тафсилотлар ошкор қилинди

Покистон ва Афғонистон чегарасида йирик махсус операция ўтказилиб, натижада террорчилик ташкилоти ИШИДнинг юқори мартабали етакчиларидан бири ушланди. Бу ҳақда Туркиянинг Anadolu агентлиги хабар тарқатди.

Мазкур хавфли террорчига қарши операция Туркия ҳамда Покистоннинг разведка хизматлари томонидан биргаликда амалга оширилди. Бу амалиётда Покистон ва Афғонистон чегарасидаги чегара ҳудуди махсус хизматлар назорати остига олинган бўлиб, “тўқ сариқ” даражада хавфли деб белгиланган террорист қўлга туширилган.

Ҳибсга олинган шахс, ИШИД сафида «Абу Ёсир Ал Туркий» тахаллуси билан танилган Ўзғур Алтун экани маълум қилинди. У Туркия фуқароси бўлиб, ИШИДнинг оммавий ахборот ва логистика тармоқларини бошқаришда катта роль ўйнаган.

Туркия разведкасининг маълум қилишича, қўлга олинган террорчи ИШИДнинг Туркия ва Европа мамлакатларига қарши қатор террористик ҳаракатларини режалаштиришда ва амалга оширишда иштирок этган. Жумладан, концерт заллари, бозорлар ва бошқа аҳоли гавжум бўлган жамоат жойларига ҳужумларни ташкил қилишда айбланмоқда. Бу хавфли террористнинг қўлга олиниши натижасида террорчиларнинг катта режалари барбод қилинган, деб хабар беради турк махсус хизматлари.

Қўлга олиш пайтида террористлар фаолияти билан боғлиқ рақамли материаллар, ҳужумлар тайёрланган режалар ва террорчиларни ёллаш ҳақидаги муҳим маълумотлар ҳам мусодара қилинган. Бу ҳужжатлар ва далиллар террористик тармоқ фаолиятининг кенг кўламини кўрсатади.

Аниқланган маълумотларга кўра, Ўзғур Алтун Туркия ва Европанинг турли минтақаларидан жангариларни жалб қилиш, уларни Афғонистон ва Покистон ҳудудларига жўнатишни мувофиқлаштириб келган. Шунингдек, Алтун ташкилотнинг пропаганда ишларида иштирок этган ва экстремистик ғояларни тарқатишда фаол рол ўйнаган.

Туркия махсус хизматлари мазкур хавфли террористнинг қўлга туширилиши нафақат Туркия ва Покистон хавфсизлиги, балки бутун минтақада тинчликни таъминлаш учун муҳим қадам эканлигини таъкидламоқда. Ушбу операциянинг муваффақиятли амалга оширилиши халқаро террорчиликка қарши курашда муҳим натижа сифатида баҳоланмоқда.

Эслатиб ўтамиз, ИШИД ташкилоти жаҳондаги кўплаб давлатлар ва халқаро ташкилотлар томонидан террорчилик ташкилоти деб эътироф этилган бўлиб, унинг фаолияти бутун дунё бўйлаб қаттиқ назорат қилинади. Ушбу гуруҳ томонидан кўплаб мамлакатларда қатор қонли ҳужумлар амалга оширилган.

Покистон ва Туркия махсус хизматларининг ушбу йирик муваффақияти, халқаро хавфсизлик ҳамда террорга қарши кураш доирасидаги муҳим воқеа сифатида баҳоланмоқда. Террорчиликнинг олдини олиш ва хавфсизликни таъминлаш бўйича келажакда ҳам бундай ҳамкорлик давом эттирилиши кутилмоқда.

Фото: Anadolu