Итлар оламида ҳар хил кўринишдаги, турли хусусиятларга эга бўлган жонзотлар бор. Аммо улар орасида Петуния исмли кичик булдог шундай бир “мақом”ни қўлга киритдики, у нафақат эгаси, балки бутун АҚШ бўйлаб миллионлаб одамларнинг диққат марказига айланди. Гап шундаки, француз ва инглиз булдогларининг наслидан дунёга келган бу кучук Калифорнияда ўтказилган “Дунёдаги энг бадбашара кучук” танловида мутлақ ғолиб бўлди, деб хабар тарқатди New York Times.
Орегон штатидан келган Петуния катта умидлар билан саҳнага чиқди ва ҳакамлар ҳайъатини ўзига хос қиёфаси, шўх қарашлари ва беқиёс жозибаси билан ҳайратда қолдирди. Танловда жами 10та ит иштирок этди, уларнинг ҳар бири ўзига хос ва бетакрор қиёфа билан саҳнага чиққан бўлса-да, Петуниянинг ғалабаси шубҳа уйғотмади.
Бу мусобақа Америкадаги энг ғайриоддий ва энг кўнгилочар анъаналардан бири ҳисобланади. Унда иштирок этган кучуклар зеб-зийнат ёки гўзаллик билан эмас, балки ўзларига хос “камчиликлари” орқали меҳр қозониши мумкин. Петуниянинг ғалабаси ҳам шуни исботлади – чиройнинг мезони ҳар доим ҳам анъанавий стандартлар эмас, балки самимийлик ва табиийлик экан.
Мусобақа ғолибига катта соврин сифатида 5000 доллар нақд пул топширилди. Шу билан бирга, Петуниянинг шон-шарафи нафақат шу пул билан, балки NBC телеканалида эфирга узатиладиган машҳур “Today” шоусида қатнашиш имконияти билан ҳам мустаҳкамланди. Бу кучук энди бутун мамлакат бўйлаб янада машҳур бўлиши ва минглаб инсонларнинг юзига табассум олиб кириши кутилмоқда.
Шубҳасиз, Петуниянинг ютуғи шунчаки “бадбашара”лик билан эмас, балки унинг қалбдан меҳр уйғотадиган, ўзига хос ва беқиёс табиати билан боғлиқ. Мана шу жиҳат уни Америкадаги энг машҳур кучуклардан бирига айлантирди.
«Замин»ни Telegram’да ўқинг!
