Украина президенти Володимир Зеленский Россия билан тинчлик музокараларини қайта жонлантириш мақсадида Туркияга йўл олаётганини маълум қилди. Унинг айтишича, Киев ҳозирда қатор ҳамкорлар билан фаол мулоқотда бўлиб, урушни тўхтатишга олиб келадиган аниқ таклифлар тайёр ҳолда турибди. Зеленскийга кўра, асосий вазифа — можарога якун ясаш имкониятларини қўлдан келганича яқинлаштириш ва асирлар алмашуви жараёнини тўлиқ қайта тиклаш.
Президентнинг баёнотидан кўп ўтмай, Туркиядаги манба Reuters агентлигига АҚШнинг махсус вакили Стив Уиткофф 19 ноябр куни Анқарага бориб, Зеленский билан ўтказиладиган музокараларда иштирок этишини маълум қилди. Шу билан бирга, AFP эълон қилган маълумотга кўра, Зеленский Туркия раҳбари Ражаб Тоййиб Эрдўған билан ҳам учрашув ўтказади.
Россия президенти матбуот котиби Дмитрий Песков айтишича, Москва Киевдан бу сафар ҳақида ҳеч қандай маълумот олмаган ва Зеленский келаётган кунларда Туркияда Россия делегацияси бўлмаслигини таъкидлади.
Маълумки, уруш бошланганидан бери Туркия ўзини икки томон ўртасида воситачи сифатида кўрсатиб келмоқда. 2025 йил майидан Истанбулда бир неча марта Украина ва Россия делегациялари учрашган, унда асосан асирлар алмашуви бўйича келишувга эришилган. Бироқ ўт очишни тўхтатиш масаласида жиддий сўзлашув бўлмаган. Энг сўнгги алмашув октябрь ойи бошларида амалга оширилган, ўшанда ҳар икки томон 185 нафардан шахсни қайтарганди.
Киев томони таъкидлашича, Москва бир неча бор урушни тугатиш бўйича реал хоҳиш намоён қилмаган ва Украина учун қабул қилиб бўлмайдиган шартларни таклиф қилган — жумладан, қўшимча ҳудудлардан воз кечиш каби талаблар.
Шу фонга қарамай, Зеленский Европа бўйлаб сафар қилар экан, у мамлакатдаги энергетик инқироз ва коррупция можаролари кучайган шароитда ғарбдан қўллаб-қувватлаш изламоқда. 18 ноябр куни у Испания бош вазири Педро Санчес билан учрашган бўлса, бир кун олдин Франция билан келишув имзолаб, Украинага 100 тагача жанговар самолёт ва бир қатор дронлар етказиб бериш бўйича келишган.
Украина ташқи ишлар вазири ўринбосари Сергей Кислица 11 ноябр куни тинчлик музокаралари Москва билан ёнма-ён ҳаракат қилиш имкони йўқлиги учун тўхтаганини маълум қилган. У РОССИЯДА диктатура шароитида музокара гуруҳлари чекланган мандат билан ишлаши ва фақат белгиланган позицияни ҳимоя қилиши мумкинлигини айтган.
Бироқ 16 ноябр куни Киевда Россия билан асирлар алмашуви бўйича билвосита мулоқот яна бошлангани маълум бўлди. Украина Миллий хавфсизлик ва мудофаа кенгаши раҳбари Рустем Умеровга кўра, ҳозир “Истанбул келишувлари”ни қайта тиклаш устида иш кетмоқда. Айнан Туркия ва БАА бу жараёнда воситачи бўлиб турибди.
Яқин кунларда техник музокаралар ўтказилиб, барча ташкилий масалалар аниқлаштирилади. Киев учун эса бу жараён ҳали ҳам тинчликка эришиш йўлидаги энг муҳим қадамлардан бири бўлиб турибди.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
