Украинадаги урушни тўхтатиш бўйича олиб борилаётган тинчлик музокаралари ягона вазифа туфайли деярли тўхтаб қолган. Бу — Киевни Донбасс ҳудудини тўлиқ тарзда Кремлга беришга қандай мажбурлаш мумкинлиги ҳақидаги саволдир. Politico нашри 8 декабрь, душанба куни юқори лавозимли европалик амалдорга таяниб, шундай ёзди.
АҚШ позицияси: Қийин танлов
Юқори мартабали европалик манбанинг Politico нашрига маълум қилишича, Американинг позицияси жуда аниқ: «Россия Украинани ҳудудлардан воз кечишга мажбур қилишни талаб этмоқда — америкаликлар эса бунга қандай эришиш мумкинлигини ўйламоқда».
Нашр суҳбатдоши: "Америкаликлар Украина Донбассни ташлаб кетиши керак, деб турибди… қай тарзда бўлмасин".
Ўз навбатида Киев ҳар қандай тинчлик келишуви жорий фронт чизиғи бўйича ҳарбий ҳаракатларни музлатиб қўйишни ўз ичига олиши кераклигини қатъий талаб қилмоқда.
Зеленскийнинг раддияси
Украина президенти Володимир Зеленский 8 декабрь куни журналистлар билан мулоқот чоғида қатъий позициясини билдирди: «Украина Россия фойдасига ўз ҳудудларидан воз кечиш учун на ҳуқуқий, на маънавий ҳуқуққа эга эмас». У, Россия эса, «шубҳасиз, украинлар ҳудудларни бериб қўйишини талаб қилаётганини» қайд этди.
Шу билан бирга, Зеленский АҚШ ҳозирда «икки томонни ҳам қониқтирадиган муросали ечим излаш устида иш олиб бораётганини» тасдиқлади.
Reuters агентлиги маълумотларига кўра, ҳозирги кунга келиб Россия Федерацияси Украина ҳудудининг 19,2 фоизини назорат қилмоқда.
Трампнинг норозилиги ва воситачи мақоми
АҚШ президенти Доналд Трамп 7 декабрь куни журналистлар саволларига жавоб берар экан, Володимир Зеленский шу вақтгача «АҚШнинг сўнгги тинчлик таклифини ҳали ўқиб чиқмаганидан бироз ранжиганини» билдирди. Шу билан бирга, Америка раҳбари бу таклифга Россия рози, деб ҳисоблашини маълум қилди, гарчи Москва «бутун мамлакатни қўлга киритишни афзал кўрар эди».
Politico билан суҳбатлашган юқори мартабали европалик амалдор ҳозирги вазиятда энг муҳим савол: «АҚШ ўзини қандай тутади: воситачи сифатидами ёки Россия томонини олган тараф сифатидами?» — дея таъкидлади.
У Киев ҳанузгача Вашингтон унга қандай хавфсизлик кафолатларини беришга тайёр эканини аниқлашни кутаётганини эслатиб ўтди.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
