Католик черкови раҳбари Рим папаси Лев XIV Рождество байрами муносабати билан бутун дунёда камида бир кунлик умумий тинчлик ўрнатишга чақирди. Унинг таъкидлашича, ҳатто қисқа муддатли бўлса-да, байрам кунлари урушлардан тийилиш инсонийлик ва ўзаро ҳурмат белгиси бўлиши керак.
23 декабрь куни кечқурун Рим яқинидаги Кастел-Гандолфо қароргоҳида журналистлар билан суҳбатда папа барча эзгу ниятли инсонларга мурожаат қилди. “Мен яна бир бор барчани камида бир кунга — ҳеч бўлмаса байрам муносабати билан тинчликка ҳурмат билан ёндашишга чақираман”, — деди у.
Лев XIVни энг кўп алам қилаётган жиҳатлардан бири — Россия томонидан ўт очишни тўхтатиш чақириқларининг рад этилиши эканини очиқ айтди. Унинг фикрича, Рождество каби муқаддас кунларда қурол сукути дунёдаги оғриқ ва азобларни енгиллаштириши мумкин.
Маълумки, Россия 2022 йил февраль ойида Украинага қарши ҳарбий ҳаракатларни бошлаганидан буён ўт очишни тўхтатиш бўйича бир неча таклифларни қабул қилмаган. АҚШнинг Флорида штатида дам олиш кунлари қайта бошланган тинчлик музокаралари ҳам ҳозирча сезиларли натижа бермади. Шу куни Украина томони Донецк вилоятидаги стратегик аҳамиятга эга Северск шаҳридан оғир жанглардан кейин чекинишини маълум қилди.
Рим папаси дунёдаги можаролар ҳақида сўзлар экан, “Мен барибир қулоқ солишларига ва бутун дунёда камида 24 соат тинчлик бўлишига умид қиламан”, дея ўз умидини яширмади.
Шунингдек, понтифик декабрь ойи бошида Италияда Украина президенти Володимир Зеленскийни қабул қилганини эслатиб ўтиш мумкин. Зеленскийнинг Украинани зиёрат қилиш таклифига папа эҳтиёткорлик билан муносабат билдириб, “Умид қиламан”, деган жавоб билан чекланган. Бироқ бундай сафар қачон амалга ошишини ҳозирча аниқ айта олмаслигини ҳам қўшимча қилган.
Папанинг бу мурожаати Рождество байрами арафасида дунё жамоатчилигида тинчлик ҳақидаги муҳокамаларни янада жонлантирди.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
