Ўзбекистон футболининг 2025 йилдаги энг яхши мураббийи сифатида эътироф этилган Темур Кападзе мукофот маросимидан сўнг ўз фикрларини билдириб, бу эътирофни шахсий эмас, жамоавий натижа сифатида қабул қилаётганини таъкидлади.
Мураббий аввало ўзининг ва оиласининг номидан барчага самимий ташаккур изҳор қилди. Унинг айтишича, бундай мукофотни қабул қилиш катта мамнуният, бироқ у бу ютуқни фақат ўз номи билан боғламайди.
Кападзе доимгидек, “бу — барчамизнинг ғалабамиз” деган фикрни яна бир бор такрорлаб, 2025 йил ҳар жиҳатдан омадли ва унутилмас бўлганини айтди. Энг муҳим томони — тарихий натижа қайд этилгани, яъни миллий жамоанинг жаҳон чемпионатига чиққани алоҳида урғуланди.
Мутахассис жаҳон чемпионатига йўлланма олинишига ўз ҳиссаси қўшилганидан фахрланишини яширмади. Шу билан бирга, у бу ютуқни “тугаш нуқтаси” эмас, балки катта йўлнинг боши деб баҳолади.
“Бу — фақат биринчи қадам, бошланиши. Ғалабаларимиз ҳали олдинда”, деган ишончли сўзлар билан Кападзе келажакка режалар ва умидлар катта эканини ҳам билдириб ўтди. У футболимиз тараққиёти учун бор кучини ишга солишга тайёрлигини қайд этди.
Якунда эса мураббий футболга бўлган эътибор ва яратилган имкониятлар учун давлат раҳбариятига алоҳида миннатдорчилик билдирди. У президент томонидан кўрсатилаётган қўллаб-қувватлов ва шароитлар футболимиз учун муҳим таянч эканини таъкидлаб, “ютуқлар давомий бўлсин”, деган тилак билан сўзини якунлади.
“Zamin”ни Telegram'да ўқинг!
