"Барселона" жамоасининг собиқ вингери Педро фаолияти давомида Лионель Месси ва Давид де Геа каби юлдуз жамоадошларини Италиянинг Лацио клубига ўтишга кўндиришга ҳаракат қилганини очиқлади. 38 ёшли испаниялик футболчи шанба куни А Серия клуби сафидаги сўнгги ўйинини ўтказди ва Римдаги фаолияти давомида амалга оширган трансфер уринишлари ҳақида сўзлаб берди. Бу ҳақда Goal.com хабар беради.
Педро Лацио сафида "Piза"га қарши кечган хайрлашув учрашувида гол уриб, жамоасининг ғалабасига ҳисса қўшди. Клубнинг расмий YouTube каналига берган интервюсида у Италия пойтахтидаги саргузаштлари якунига етганини тасдиқлади. Римликлар сафида жами 209 та ўйинда майдонга тушиб, 39 та гол урган фахрий футболчи учун бу мавсум бироз омадсиз келди — жамоа А Серияда тўққизинчи ўринни эгаллаб, еврокубоклардан қуруқ қолди.
Майдондаги ҳаракатларидан ташқари, Педро норасмий равишда "селекционер" вазифасини ҳам бажарганини тан олди. У Лионель Месси, Давид де Геа ва Жорди Алба каби юлдузларни Лацио сафига олиб келишга уринган. "Мен доим ҳаракат қилганман. Ҳатто Месси билан ҳам гаплашганман, лекин бу осон эмас эди (кулади). Кейин Жорди Алба ва Давид де Геа эркин агент бўлган вақтларида уларни чақирдим. Шунингдек, Сарри билан Бартра ва Давид Луиз ҳақида ҳам гаплашганим ёдимда", — дейди Педро.
Педро Италия футболини дунёнинг энг совриндор ўйинчиларидан бири сифатида тарк этмоқда. У Испания терма жамоаси билан Жаҳон чемпиони ва Европа чемпиони бўлган. Клуб миқёсида эса "Барселона" билан уч марта Чемпионлар лигаси, бешта Ла Лига ва иккита Клублар ўртасидаги жаҳон чемпионлигини қўлга киритган. Шунингдек, Челси сафида Англия Премер-лигаси ва Европа лигасида зафар қучган.
Ҳозирча фахрий вингер кейинги манзили қаер бўлишини маълум қилмади. Хайрлашув хабарида у клуб, мухлислар ва жамоани бирлашишга чақирди. "Ишончим комилки, бир неча йилдан сўнг Лацио яна совринлар учун курашадиган ва Европада ўз сўзини айтадиган даражага қайтади. Умид қиламанки, бир кун келиб жамоага ёрдам бериш учун қайтаман", — дея қўшимча қилди испаниялик юлдуз.
“Zamin”ни Telegram'да ўқинг!
