АҚШ ҳукумати Жанубий Кореянинг йирик чип ишлаб чиқарувчи компаниялари – Samsung ва SK Hynix'нинг Хитойдаги фаолиятига чекловлар қўйди. Энди улар АҚШ ускуналарини олиб кириш учун махсус лицензия олишлари керак бўлади.
Бу қарор 2022-йилда Хитойга нисбатан жорий этилган кенг кўламли чекловларнинг бир қисми ҳисобланади. Олдинроқ Samsung ва SK Hynix'га бу қоидалардан истисно берилган эди. Энди эса бу рухсатлар бекор қилинди.
АҚШ ҳукумати мавжуд заводларни ишлатишга рухсат беришини айтди, аммо уларнинг кенгайтирилишига ёки янги технологиялар киритилишига лицензия бермаслигини билдирди. Бу эса компаниялар учун катта тўсиқ бўлиши мумкин.
Мазкур қарор АҚШнинг ўз чип ускуналари ишлаб чиқарувчиларига ҳам таъсир қилади. Масалан, KLA Corp, Lam Research ва Applied Materials каби компаниялар Хитой бозорида савдо ҳажмини йўқотиши мумкин. Уларнинг акциялари аллақачон пасайиб кетди.
Мутахассисларнинг фикрича, бу қадам Хитой ички бозоридаги маҳаллий ишлаб чиқарувчиларни қўллаб-қувватлаши мумкин.
«Замин»ни Telegram’да ўқинг!
