Warner Music Group сунъий интеллект соҳасидаги Sureel AI стартапини сотиб олди

Warner Music Group (ВМГ) чоршанба куни муаллифлик ҳуқуқини ҳимоя қилишга ихтисослашган Sureel AI стартапини сотиб олганини эълон қилди. Sureel компаниясининг патентланган технологияси қўшиқлар учун ўзига хос “AI ДНА” яратади ва уларни таркибий қисмларга ажратиб, сунъий интеллект моделлари ушбу элементлардан қандай фойдаланаётганини кузатиш имконини беради. Бу ҳақда Techcrunch.com хабар беради.

Ушбу харид орқали ВМГ ўз ижодкорлари ва бастакорларининг асарлари AI томонидан яратилган контентда ёки моделларни ўқитишда қачон ишлатилишини аниқроқ назорат қилишни мақсад қилган. ВМГ бош ижрочи директори Роберт Кйнкл таъкидлашича, Sureel'нинг қўшилиши ижодий ҳамжамиятнинг интеллектуал мулки, исми, қиёфаси ва овози устидан назоратни ҳамда монетизация имкониятларини кучайтиради.

2022-йилда асос солинган Sureel AI нафақат аудит ва мувофиқлик ҳисоботларини тақдим этади, балки овоз клонлари ва AI-аватар каби ҳолатларда ижодкорларнинг шахсий идентификациясини ҳимоя қилувчи махсус воситаларга ҳам эга. Стартап мустақил платформа сифатида фаолиятини давом эттиради ва бутун мусиқа ҳамда AI экотизимига хизмат кўрсатади.

Қизиқарли жиҳати шундаки, Warner Music Group дастлаб AI стартапларига қарши чиққан эди. Хусусан, компания 2024-йилда Suno стартапини судга берган, бироқ кейинчалик улар билан лицензиялаш шартномасини имзолаган. Шунингдек, ВМГ ўтган йили Удио стартапи билан ҳам келишувга эришган эди.

Ҳозирда Sony Мусик Энтертаинмент ва Универсал Мусик Груп каби бошқа йирик лейблар ҳали ҳам AI мусиқа стартапларига қарши муаллифлик ҳуқуқи бузилиши бўйича йирик даъволарни давом эттирмоқда. ВМГ эса бу борада ҳамкорлик ва технологик назорат йўлини танлаган кўринади.