Markaziy Osiyo davlatlaridan, jumladan, O'zbekistondan yuk poyezdlarining Kaspiy dengizidagi Quriq porti tomon harakati vaqtincha to'xtatildi. MDH davlatlari temir yo'l transporti kengashi direksiyasi tomonidan joriy yilning 20-noyabriga qadar yuk poyezdlarining jo'natilishi taqiqlangan.
Ushbu chora Qozog'istonning milliy temir yo'l operatori “Qozog'iston temir yo'li” tashabbusi bilan amalga oshirilib, u O'zbekiston, Qirg'iziston, Tojikiston va Turkmaniston yuk tashuvchilariga bevosita ta'sir ko'rsatdi. Bunday qaror qabul qilinishining asosiy sababi port hududida yuk ortilgan vagonlarning haddan tashqari ko'pligi bo'lib, ularning soni Markaziy Osiyodan kelgan 700 dan ortiq vagonga yetgan.
Vaziyatni yanada murakkablashtiruvchi omil sifatida noyabr oyida portning bir qismida rejalashtirilgan ta'mirlash ishlari ko'rsatilmoqda. Qozog'istonning Mang'istov viloyatida joylashgan va 2018-yildan faoliyat yuritayotgan Quriq porti Markaziy Osiyoni Ozarbayjon orqali Yevropa bilan bog'laydigan tranzit yo'navishining muhim qismi hisoblanadi.
Port infratuzilmasi zamonaviy logistika markazi va bir vaqtning o'zida 54 vagongacha yuklarni qayta ishlash imkoniyatiga ega bo'lgan parom kompleksidan iborat. Ushbu dengiz uzeli orqali Markaziy Osiyodan Yevropa bozorlariga turli xil mahsulotlar yetkazib beriladi.
Mazkur to'xtatish mintaqadagi eksport-import operatsiyalarida muayyan qiyinchiliklarni yuzaga keltirib, transport yo'laklariga bo'lgan o'sib borayotgan talabni va ularning uzluksiz yetkazib berishni ta'minlash uchun rivojlantirilishi hamda modernizatsiya qilinishi zarurligini ko'rsatmoqda. Transkaspiy xalqaro transport yo'nalishi (TMTY), Quriq porti qismi hisoblangan ushbu yo'nalish, Yevroosiyo koridorlarining asosiy yo'llaridan biri sifatida qaralib, u Xitoydan Yevropaga yuklarni yetkazish vaqtini an'anaviy dengiz yo'liga nisbatan uch barobar qisqartirish imkonini beradi.
