Bugun, 30 yanvar kuni O‘zbekiston futbol assotsiatsiyasining navbatdagi hisobot-saylov kongressi bo‘lib o‘tdi. Yig‘ilishning birinchi qismi an’anaviy ravishda eng qiziq jihatdan — rahbariyat bo‘yicha ovoz berishdan boshlandi.
Natijada Bahodir Qurbanov O‘zFA prezidenti sifatida yana ishonch qozondi. Shuningdek, Ravshan Ermatov hamda Odil Ahmedov assotsiatsiyaning vice-prezidentlari lavozimiga qayta saylandi. Qisqasi, futbolimizda “kadrlar almashdi” emas, “ishonch yangilandi” — shu ssenariy.
Marosimning ikkinchi qismi esa muxlislar kutgan lahza — 2025 yilning eng yaxshilarini taqdirlash bilan davom etdi. O‘zbekiston milliy jamoasini Jahon chempionatiga olib chiqqan Temur Kapadze yilning eng yaxshi murabbiyi deb topildi. Turkiya Superligasida gollar bo‘yicha yetakchilar qatorida yurib, “hujumdagi motor”ga aylangan Eldor Shomurodov esa yilning eng yaxshi futbolchisi sifatida e’tirof etildi.
2025 yilning eng yaxshilari nominatsiyalari g‘oliblari
Yilning eng yaxshi futbolchisi — Eldor Shomurodov («Башакшеҳир»)
Eng yaxshi ayol futbolchi — Diyora Habibullaeva («Севинч»)
Ayollar ligasining eng yaxshi futbolchisi — Nilufar Qudratova («Севинч»)
Eng yaxshi murabbiy — Temur Kapadze (O‘zbekiston milliy jamoasi / «Навбаҳор»)
Ayollar futbolida eng yaxshi murabbiy — Vladislav Xan («Севинч»)
Eng yaxshi yosh o‘yinchi — Sadriddin Hasanov (O‘zbekiston U-17 jamoasi vingeri)
Eng yaxshi hakam — Ilgiz Tantashev
Eng yaxshi ayol hakam — Nasibabonu Toshmuhammedova
Bolalar futboli bo‘yicha eng yaxshi murabbiy — Yusuf Ergashyev («Бунёдкор»)
Eng yaxshi hududiy futbol assotsiatsiya — Qoraqalpog‘iston FA
Fidoyilik ramzi — Husan Temirov (uzoq yillar «Насаф» o‘yinlarini sharhlab borgan sharhlovchi)
Futbolimiz nuroniysi — Ahrol Inoyatov («Пахтакор» sobiq futbolchisi)
Bu natijalar bir narsani ko‘rsatyapti: 2025 yilda ham futbolimizda ham mehnat, ham natija, ham fidoyilik e’tibordan chetda qolmadi. Endi eng muhimi — bu e’tiroflar qog‘ozda emas, maydondagi yangi yutuqlarga aylansin.
“Zamin”ni Telegramʻda oʻqing!
