"Manchester Yunayted" vaqtinchalik bosh murabbiyi Maykl Karrik klub rahbariyatidan kelajagi borasida yakuniy qaror qabul qilishni talab qilmayotganini ma'lum qildi. Karrik jamoani qabul qilib olganidan so'ng natijalar sezilarli darajada yaxshilangan bo'lsa-da, u bor e'tiborini joriy vazifalarga qaratgan. Murabbiyning ta'kidlashicha, uning asosiy maqsadi jamoani Yevropa Chempionlar ligasiga olib chiqishdir. Bu haqda Goal.com xabar beradi.
Klub «Brentford»ga qarshi o'yin oldidan Karrik o'zining maqomi borasida xotirjam ekanini bildirdi. Uning so'zlariga ko'ra, rahbariyat bilan muzokaralar uchun aniq muddat belgilanmagan va vaziyat o'z vaqtida oydinlashadi. Karrik o'zini klub afsonasi Ole Gunnar Sulsher bilan solishtirishlariga ham munosabat bildirdi. U har bir murabbiyning faoliyati o'ziga xos sharoitda kechishini va o'tmishdagi tajribalar hozirgi holatga ta'sir qilmasligini aytdi.
«Men Sulsherni juda hurmat qilaman, u mening yaqin do'stim. Biz birga ko'p yaxshi ishlarni amalga oshirganmiz. Biroq turli davrlardagi murabbiylar va jamoalarni solishtirish mantiqsiz. Hozir biz butunlay boshqa jamoamiz va bu solishtirishlar hech qanday ahamiyatga ega emas», — dedi Karrik. U so'nggi 100 kun ichida Angliya futbolida murabbiylar almashinuvi tezlashganini, ammo o'zi faqat ijobiy natijalarga erishish haqida o'ylayotganini qo'shimcha qildi.
Hozirda "Manchester Yunayted" uchun asosiy maqsad Yevropaning eng nufuzli turniriga qaytish bo'lib qolmoqda. Agar «qizil iblislar» dushanba kuni «Old Trafford»da «Brentford» ustidan g'alaba qozonsa, kuchli beshlikdan joy olish imkoniyatini keskin oshiradi. Buning uchun jamoaga qolgan to'rtta uchrashuvda atigi ikki ochko kifoya qilishi mumkin.
“Zamin”ni Telegramʻda oʻqing! 
