3Logic Group kompaniyasi Raskat yangi brendi ostida televizorlar bozoriga kirib keldi. Kompaniya zamonaviy «aqlli» funksiyalarga emas, balki oddiy va hamyonbop yechimlarga urgʻu bermoqda. Bu haqda Ixbt.com xabar beradi.
Dastlabki bosqichda 23,6 va 31,5 dyuymli ikkita model taqdim etildi. Ushbu televizorlarda Smart TV funksiyasi mavjud emas, chunki ular asosan mehmonxonalar, tibbiyot muassasalari va ofislar kabi korporativ segment uchun moʻljallangan.
Qurilmalar bazaviy texnik xususiyatlarga ega: HD-sifat (1366×768 piksel) va standart HDMI, USB, AV hamda CI interfeyslari bilan jihozlangan. Kichikroq model, shuningdek, eski kompyuterlar bilan ishlash uchun D-Sub (VGA) portiga ega.
Ishlab chiqaruvchining taʼkidlashicha, Smart TV funksiyasidan voz kechish foydalanishni soddalashtirish va narxni pasaytirish maqsadida amalga oshirilgan. Agar foydalanuvchiga onlayn xizmatlar kerak boʻlsa, tashqi pristavkalardan foydalanish tavsiya etiladi.
Hozircha narxlar oshkor etilmagan, biroq sotuvlar yirik tarmoqlar va marketpleyslar orqali amalga oshirilishi rejalashtirilgan. Kelgusida kompaniya kattaroq ekranli va YaOS hamda Salyut TV platformalariga asoslangan Smart TV modellarini ham chiqarishni koʻzlamoqda.
“Zamin”ni Telegramʻda oʻqing!
