Mashhur Discord messenjeri o‘z platformasidagi barcha foydalanuvchilar uchun ovozli va video qo‘ng‘iroqlarni oxirigacha shifrlash (end-to-end encryption) texnologiyasini ishga tushirdi. Ushbu yangilik muloqot maxfiyligini ta’minlashda muhim qadam bo‘lib, endilikda foydalanuvchilarning suhbatlarini hatto Discord kompaniyasining o‘zi ham eshita olmaydi. Bu haqda Techcrunch.com xabar beradi.
Kompaniya vakili Mark Smitning so‘zlariga ko‘ra, ushbu funksiya hech qanday qo‘shimcha sozlamalarni talab qilmaydi va avtomatik tarzda barcha uchun faollashtirilgan. Shifrlash tizimi platformadagi barcha shaxsiy ovozli va video qo‘ng‘iroqlarga tatbiq etiladi, faqat "stage channels" deb nomlanuvchi ommaviy kanallar bundan mustasno.
Ushbu o‘zgarish texnologiya olamida maxfiylik masalalari qizg‘in muhokama qilinayotgan bir paytda amalga oshirildi. Xususan, Meta kompaniyasi Instagram’dagi shifrlangan xabarlar funksiyasidan voz kechgan, TikTok esa AQSh bozorida o‘z xabarlarini oxirigacha shifrlamasligini ma’lum qilgan edi.
Discord 2024-yilda ushbu texnologiyani sinov tariqasida taqdim etgan bo‘lsa, endilikda u butun dunyo bo‘ylab yuz millionlab foydalanuvchilar uchun standart xavfsizlik chorasiga aylandi. Bu foydalanuvchilarning shaxsiy ma’lumotlari va muloqot xavfsizligini himoya qilish borasidagi muhim yutuq hisoblanadi.
“Zamin”ni Telegramʻda oʻqing!
