Hisense kompaniyasi haqiqiy kinematografiya tajribasini uy sharoitiga koʻchirishga moʻljallangan Exploration X1 Pro lazerli televizorini taqdim etdi. Qurilma 100 dyuym va undan yuqori formatdagi tasvirlarni yaratishga qodir boʻlib, unda professional kinoteatr tizimlaridan ilhomlangan texnologiyalar qoʻllanilgan. Bu haqda Ixbt.com xabar beradi.
Exploration X1 Pro maxsus CineCore yorugʻlik moduli bilan jihozlangan hamda IMAX proyektorlarida ishlatiladigan sanoat darajasidagi uch rangli lazer va DLP MCL39 raqamli proyeksiyalash arxitekturasidan foydalanadi. Ishlab chiqaruvchining taʼkidlashicha, rang qamrovi BT.2020 maydonining 110 foizini tashkil etadi, rang uzatish aniqligi esa delta E = 0,6 ga teng. Bu koʻrsatkich oddiy uy monitorlaridan sezilarli darajada yuqoridir.
Yangi avlod ekrani nanospektral selektiv filtrlash texnologiyasi bilan jihozlangan boʻlib, u faqat tomosha uchun zarur boʻlgan yorugʻlikni yoʻnaltirilgan tarzda aks ettiradi. Bu esa atrofdagi tarqoq yorugʻlik xalaqitlarini samarali ravishda bartaraf etish imkonini beradi.
Qurilma bir nechta tomosha rejimlari va Harman Kardon sabvuferiga ega ilgʻor audio tizimi bilan taʼminlangan. Ovoz tizimi 33 Hz gacha boʻlgan past chastotali baslarni qoʻllab-quvvatlaydi. Hisense Exploration X1 Pro devordan bor-yoʻgʻi 34 sm masofada turib 100 dyuymli tasvirni shakllantira oladi.
Ekran qalinligi atigi 3 sm boʻlib, uni devorga osib qoʻyish yoki yigʻib olish juda oson. Mazkur texnologik yangilikning Xitoydagi boshlangʻich narxi 4100 dollar etib belgilangan.
“Zamin”ni Telegramʻda oʻqing!
