Elon Musk kelajak raketalari, xususan, Starship uchun tortish kuchining massaga nisbati yuqori boʻlishi nima uchun oʻta muhim ekanligini tushuntirib berdi. Uning soʻzlariga koʻra, toʻliq koʻp marta foydalaniladigan tizimlarga oʻtishda uchirish iqtisodiyoti tubdan oʻzgaradi. Bunday raketalarda asosiy xarajat yoqilgʻi narxiga bogʻliq boʻlib qoladi. Bu haqda Ixbt.com xabar beradi.
Shu sababli, dvigatellar koʻproq yoqilgʻi sarflagan taqdirda ham, ularni kuchliroq qilish foydaliroqdir. Tortish kuchining massaga nisbati yuqori boʻlishi raketaga tezlikni tezroq oshirish, gravitatsiyani samaraliroq yengib oʻtish va yakunda orbitaga yuk yetkazib berish tannarxini pasaytirish imkonini beradi. Hatto 80 foizga koʻp marta foydalaniladigan Falcon 9 raketasida ham yuqori bosqichning yoʻqotilishi yoqilgʻi sarfidan ancha qimmatga tushadi.
Boom Supersonic asoschisi Blake Scholl yangi avlod Starship raketasining start maydonchasidan qanchalik tez koʻtarilganini koʻrsatuvchi videoga izoh berib, tortish kuchi va massa toʻgʻri tanlanganda raketa haqiqiy quvvat bilan parvoz qilishini taʼkidladi. Avvalroq Elon Musk Starship kemasining issiqlikdan himoya qatlami navbatdagi sinov parvozida oʻz vazifasini toʻliq bajarganini maʼlum qilgan edi.
Eslatib oʻtamiz, SpaceX oʻzining 12-parvozi davomida rekord oʻrnatdi. Raketa orbitaga taxminan 45 tonna ogʻirlikdagi Starlink sunʼiy yoʻldosh simulyatorlarini olib chiqdi. Shuningdek, kema bortida suratga olish uchun maxsus moslashtirilgan ikkita modifikatsiyalangan Starlink qurilmasi ham boʻlgan. Hozirda AQSH Federal aviatsiya boshqarmasi (FAA) parvozdan keyingi holatlar boʻyicha tekshiruv oʻtkazish masalasini koʻrib chiqmoqda.
“Zamin”ni Telegramʻda oʻqing!
