Hashamatli smartfonlar ishlab chiqaruvchi Vertu brendi payshanba kuni korporativ dasturiy taʼminot bilan ishlaydigan va ish jarayonlarini muvofiqlashtiruvchi AI-agentga ega yangi buklama telefonini taqdim etdi. Alphafold deb nomlangan ushbu qurilma asosan yoʻlda biznes operatsiyalarini boshqaradigan va aloqada boʻladigan rahbarlar uchun moʻljallangan. Smartfonning buzoq terisidan ishlangan boshlangʻich versiyasi 6 880 dollardan sotiladi, alligator terisi, 18 karatli oltin va tabiiy brilliantlar bilan bezatilgan yuqori modellar narxi esa 46 800 dollargacha yetishi mumkin. Bu haqda Techcrunch.com xabar beradi.
Alphafold qurilmasi Nous Research kompaniyasining ochiq kodli Hermes loyihasiga asoslangan Hermes Agent tizimi bilan jihozlangan. Ushbu agent ERP va CRM kabi korporativ tizimlarga ulanib, tabiiy tildagi buyruqlar orqali tasdiqlashlar, rejalashtirish, savdo monitoringi va sayohatlarni tashkil etish kabi vazifalarni bajara oladi. Shuningdek, u OpenAI’ning GPT, Anthropic’ning Claude va Google’ning Gemini kabi bir nechta AI modellari oʻrtasida soʻrovlarni yoʻnaltirish imkoniyatiga ega.
Vertu bosh direktori Molly Maʼning taʼkidlashicha, yirik ishlab chiqaruvchilarning AI funksiyalari asosan tasvirlarni tahrirlash kabi isteʼmolchi vositalariga qaratilgan, Alphafold esa murakkab korporativ ish jarayonlariga urgʻu beradi. Xavfsizlikni taʼminlash uchun qurilmaga maxsus A5 chipi oʻrnatilgan boʻlib, u biometrik maʼlumotlar va maxfiy korporativ axborotni asosiy operatsion tizimdan ajratilgan holda saqlaydi. Tijoriy maʼlumotlar qurilmaning oʻzida qayta ishlanadi, tashqi AI modellariga yuboriladigan soʻrovlar esa anonimlashtiriladi.
Texnik jihatdan Alphafold Qualcomm Snapdragon 8 Gen 4 protsessori, 8,05 dyuymli asosiy va 6,53 dyuymli tashqi ekran bilan taʼminlangan. Qurilma 6 500 mA/soat sigʻimli akkumulyator, sunʼiy yoʻldosh aloqasi va 50 megapikselli uchta kamera tizimiga ega. Vertu maʼlumotlariga koʻra, titan va uglerod tolasidan ishlangan buklanish mexanizmi 650 000 marta ochib-yopishga bardosh bera oladi. Bu brendning iPhone davridan keyin smartfon bozorida oʻz mavqeini tiklash yoʻlidagi navbatdagi urinishidir.
“Zamin”ni Telegramʻda oʻqing!
