Nevada shtatining jazirama issigʻida Boady Santavy ismli kanadalik ogʻir atletikachi 183 kilogrammlik shtangani koʻtarishga urinmoqda. Agar u buni uddalasa, 250 ming dollar yutib oladi. Santavy Marvel olami qahramonlarini eslatuvchi mushaklarga ega boʻlsa-da, bu safar jahon rekordini yangilay olmadi. U Las-Vegasda oʻtkazilayotgan Enhanced Games — sportchilarning deyarli barchasi samaradorlikni oshiruvchi preparatlar (doping) isteʼmol qilgan holda qatnashadigan shov-shuvli musobaqa ishtirokchilaridan biridir. Bu haqda Techcrunch.com xabar beradi.
Tanqidchilar tomonidan “steroid Olimpiadasi” deb atalayotgan ushbu oʻyinlar anʼanaviy sport qoidalarini butunlay chetga surib qoʻydi. Ishtirokchilar anaboliklar, testosteron, peptidlar va oʻsish gormonlarini tibbiy nazorat ostida qabul qilishadi. Musobaqadan oldin sportchilar Birlashgan Arab Amirliklarida 12 hafta davomida shifokorlar nazoratida maxsus “protokollar” — dori kokteyllari yordamida tayyorgarlik koʻrishgan. Gʻoliblar va jahon rekordini yangilaganlar uchun 1 million dollargacha mukofot puli vaʼda qilingan.
Ushbu gʻalati tomoshaning ortida Silikon vodiysi turibdi. Enhanced Games loyihasi kripovalyuta, AI va biotexnologiya sohalari mutaxassislari tomonidan tashkil etilgan startap mahsulidir. Loyihani taniqli investor Peter Thiel va Coinbase sobiq rahbari Balaji Srinivasan kabi yirik shaxslar moliyalashtirmoqda. Bu voqea Silikon vodiysida ommalashib borayotgan “human enhancement” (inson imkoniyatlarini kengaytirish) sanoatining bir qismidir.
Biroq anʼanaviy sport tashkilotlari bu tashabbusga keskin qarshi chiqmoqda. Butunjahon aksildoping agentligi (WADA) ushbu oʻyinlarni “xavfli” deb atadi. AQSH aksildoping agentligi rahbari Travis Tygart esa buni “foydani inson salomatligidan ustun qoʻyuvchi masxarabozlik” deb taʼrifladi. Shunga qaramay, texnologiya gigantlari inson tanasini dori vositalari yordamida “modernizatsiya qilish” gʻoyasini qoʻllab-quvvatlashda davom etmoqda.
“Zamin”ni Telegramʻda oʻqing!
