Taniqli tahlilchi Ming-Chi Kuo maʼlumotlariga koʻra, iPhone 18 Pro seriyasi oʻzgaruvchan diafragmali yangi asosiy kameraga ega boʻladi. Sanoat manbalarining taʼkidlashicha, yangi harakatlanuvchi linzalar tizimi hozirgi iPhone 17 Pro modelida qoʻllaniladigan 7P linzalariga qaraganda oʻrtacha 50 foizga qimmatroq turadi. Bu haqda Ixbt.com xabar beradi.
Kutilayotgan oʻzgarishlarga qaramay, kamera tizimining umumiy koʻrinishi tanishligicha qoladi. Hozirgi sizib chiqqan maʼlumotlar Apple kompaniyasi uchta 48 megapikselli sensorli tizimni saqlab qolishini, biroq eng katta texnik yangilanish aynan asosiy kamerada yuz berishini koʻrsatmoqda.
Oʻzgaruvchan diafragma obʼyektivga sensorga tushadigan yorugʻlik miqdorini jismoniy jihatdan tartibga solish imkonini beradi. Bu past yorugʻlik sharoitida suratga olish sifatini sezilarli darajada oshiradi va yorqin muhitda tasvir chuqurligini (bokeh effekti) yaxshiroq nazorat qilishni taʼminlaydi.
Kameradan tashqari, yangi smartfonlar keyingi avlod Apple A20 Pro chipi va iOS 27 tizimidagi yangilangan “Kamera” ilovasi bilan debyut qilishi kutilmoqda. Apple odatda apparat qismidan koʻra dasturiy taʼminot va hisoblash fotografiyasiga tayanishni afzal koʻradi, biroq bu safar jismoniy oʻzgarish asosiy planga chiqadi.
Agar ushbu xabarlar oʻz tasdigʻini topsa, iPhone 18 Pro soʻnggi yillardagi eng muhim kamera yangilanishini taklif qilishi mumkin. Bu esa Apple smartfonlarining professional suratga olish imkoniyatlarini yangi bosqichga olib chiqadi.
“Zamin”ni Telegramʻda oʻqing!
