Трамп: «Зеленскийнинг Қрим ҳақидаги баёнотлари можарони янада кескинлаштирмоқда»

Украина президенти Владимир Зеленскийнинг Қримни Россияга қарашли ҳудуд деб тан олишни рад этиши ҳақида берган баёнотлари, можарони дипломатик йўл билан тартибга солиш бўйича музокараларни янада қийинлаштирмоқда. Бу ҳақда АҚШ президенти Дональд Трамп ўзининг Truth Social ижтимоий тармоғида маълум қилди.

«The Wall Street Journal» газетасига кўра, Зеленский «Украина Қримни Россия ҳудуди сифатида ҳуқуқий жиҳатдан тан олмайди, бу мавзуда муҳокама қилиш учун ҳеч нарса йўқ», дея мағрурлик билан гапирган. Трампнинг фикрича, бу каби кескин сўзлар Россия билан тинчлик музокаралари жараёнига жиддий зарар етказади. «Чунки Киев бу ҳудудни АҚШ собиқ президенти Барак Обама давридаёқ қўлдан чиқарган ва бу ҳақида гаплашиш ҳам кулгили», деб ёзади Трамп.

Оқ уй раҳбари Зеленскийнинг бундай баёнотлари вазиятни ечим топиш ўрнига, аксинча, янада кескинлаштиришига ишонч билдирган.

«Ҳеч ким Зеленскийдан Қримни Россия ҳудуди сифатида тан олишини талаб қилмаяпти. Лекин агар унга Қрим керак бўлганида, у ўн бир йил аввал Қрим бир ўқ ҳам отилмасдан Россияга ўтиб кетганда нега қаршилик кўрсатмаган? Аслида, бу ҳудудда Россиянинг катта сув ости кемалари базалари анчадан бери жойлашганди. Зеленскийга ўхшаган одамларнинг провокацион баёнотлари бу можарони дипломатик йўл билан ҳал қилишни қийинлаштирмоқда. У мақтаниши мумкин бўлган ҳеч нарса йўқ», дея таъкидлади Трамп.

Унинг сўзларига кўра, ҳозир Украина олдида икки йўл турибди — тинчликка келиш ёки яна уч йил жанг қилиб, давлат сифатида йўқолишгача бориш.

«Мен Россия билан ҳеч қандай алоқам йўқ. Лекин ҳар ҳафта беҳуда қурбон бўлаётган ўртача беш минг украин ва рус ҳарбийларини қутқаришга қизиқаман», деди АҚШ президенти.

Трампнинг фикрича, Зеленскийнинг Қрим ҳақидаги баёнотлари қонли можарони давом эттиришдан бошқа натижа бермайди ва буни ҳеч ким хоҳламаяпти.

«Биз тинчлик битимига жуда яқинмиз, аммо «ўйнаш учун керакли карталари йўқ» одам (Зеленский назарда тутилмоқда) энди буни тушуниши лозим. Мен Украина ва Россияга шу инқироздан чиқишда ёрдам бериш имкониятини интиқлик билан кутмоқдаман. Агар мен президент бўлганимда бу можаро умуман бошланмаган бўлар эди», дейди Трамп.

АҚШнинг тинчлик ташаббуси ҳақидаги тахминлар

Аввалроқ, 21 апрел куни «Washington Post» нашри АҚШ Украина ва Россия ўртасида тинчлик битимига эришиш бўйича ўзининг таклифларини Лондонда бўлиб ўтадиган музокараларда билдиришини ёзган эди.

Жумладан, АҚШ Қримни Россияга тегишли деб расман тан олишга тайёр экани маълум қилинган. Шунингдек, Россияга қарши санкцияларни бекор қилиш таклиф этилган, лекин бунга жавобан Россия жанговар ҳаракатларни тўлиқ тўхтатиши керак бўлади. Бу, амалда, ҳарбий ҳаракатларни музлатиш деганидир.

Бунга жавобан Зеленский Қрим, Запорожье атом электр станцияси ва НАТО билан боғлиқ ҳар қандай гап-сўзларни «спекуляция» деб атаган. Унинг фикрича, ўт очишни тўлиқ ва шартсиз тўхтатиш Украина ва Россия ўртасидаги ҳар қандай мазмунли музокараларни бошлаш учун биринчи ва асосий шартдир. «Замин»ни Telegram’да ўқинг!