Лукашенко ва АҚШ вакили Минскда тинчлик музокаралари бўйича учрашди

Минск шаҳрида навбатдаги дипломатик мулоқот: Беларус президенти Александр Лукашенко ва АҚШ президентининг Россия ва Украина бўйича махсус вакили Кит Келлог Мустақиллик саройида муҳим учрашув ўтказди. Белта давлат агентлигининг маълум қилишича, суҳбат самимий ва очиқ руҳда ўтган.

Александр Лукашенко учрашув аввалида сўзга чиқиб, “Жаноб генерал, сиз билан учрашганимдан жуда хурсандман. Умид қиламанки, суҳбатимиз жуда самимий ва очиқ бўлади. Акс ҳолда, учрашувдан нима фойда? Агар биз бир-биримиз олдида ақлли ва айёр бўлсак, натижага эришолмаймиз”, дея таъкидлади.

Кит Келлог эса “биз жуда хавфли ва мураккаб даврда яшаяпмиз, агар доно ва адолатли бўлмасак, инқирозлар кескинлашиши мумкин”, деб жавоб қайтарди.

Лукашенко қўшимча қилиб: “Мен сизга ваъда бераманки, Беларус ҳудудида тўлиқ хавфсизлик таъминланади ва бу вақт ичида на Беларусда, на атроф-муҳитимизда кескинлашув бўлмайди”, дея эътироф этди.

Учрашувнинг бошқа жиҳатлари ошкор қилинмади. Бироқ, халқаро кузатувчилар ва Reuters манбасига кўра, мазкур мулоқот Россия ва Украина ўртасидаги боши берк кўчага кириб қолган тинчлик музокараларини қайта жонлантириш учун янги имконият сифатида баҳоланмоқда.

Шу билан бирга, Кит Келлог сўнгги йилларда Беларусга ташриф буюрган энг юқори мартабали АҚШ расмийсига айланди. 2020 йилда Давлат котиби Майк Помпео Минскка келган эди — бу 1993 йилдан бери АҚШнинг бундай даражадаги илк расмий ташрифи бўлган. АҚШда сиёсий ҳокимият алмашганидан сўнг ва, айниқса, 2022 йилда Россиянинг Украинага кенг кўламли босқинидан кейин, Байден маъмурияти Минскдаги АҚШ элчихонаси фаолиятини тўхтатди ва Беларусь–АҚШ муносабатлари янги босқичга ўтди.

Беларусдаги президентлик сайлови, оммавий норозиликлар ва мамлакатдаги қатағонлардан сўнг, Вашингтон расмий сиёсати сезиларли ўзгарди. Шу сабаб, Кит Келлог ташрифи халқаро майдонда катта диққат марказига айланди.

Минскдаги мазкур учрашув тинчлик музокараларини қайта тиклаш йўлида муҳим қадам бўлиши мумкин. Музокара натижалари ва унинг Европа хавфсизлигига таъсири борасида таҳлилчилар ва жамоатчилик катта қизиқиш билан кузатмоқда. «Замин»ни Telegram’да ўқинг!